uMthunywa
Cornelius Luphahla
LOKHU ididekile njalo iphelelwe ngamasu imuli yakoMoyo esigabeni sakoSigola empumalanga buqamama ledolobho lakoBulawayo ngemva kokuba esinye isakhamuzi sakule indawo sifelwe ngumntanaso egudlwe yisivalo somtshova unyawo wasemila iqubu elize lambulala.
Isiga lesi senzakale kuviki ephelileyo lapho uBlessing Moyo obhubhe ngemva kokugudlwa yisivalo somtshova wasemila iqubu elikhukhumale laze lambulala. Kuzwakale ukuthi ngethuba esebhubhile uyisekazi utshinge wadla amahabula ethi bathi nguye ombuleleyo.
UMthunywa uxhumane lesinye isakhamuzi sakule indawo uMnumzana Mlibazisi Ncube ochaze ukuthi wayekhona mhla umuyi egudlwa yisivalo somtshova.
“Mina ngangikhona mhla umuyi uBlessing egudlwa unyawo yisivalo njalo kazange walimala. Okwangimangalisayo yikuthi ngemva kwamalanga ngezwa sokuthiwa usesesibhedlela ukuyahlinzwa ngoba sokukhukhumele lapho agudlwa khona yisivalo,” kuveza uMnu Ncube.
Uqhubekele phambili njalo walandisa ukuba kuthe ngemva kokubhubha kukamuyi uyisekazi wezwakala sesithi uyise uthe nguye lonina abambuleleyo.
“Isimanga yikuthi kwathi ngemva kokubhubha kukaBlessing uyisekazi sambona ethutsha esidla ubhedu kubaphurofethi abakule indawo ethi ufuna bamhlole ukuthi uyaloya yini ngoba sokuthiwa nguye ombuleleyo.
Ngemva kwalokho abaphurofethi laba bathi ngeke babahlole mhlalokho ngoba abazimiselanga ukusebenza babuye kwelinye ilanga,” kuchaza uMnu Ncube.
Ebuzwa ngalendaba uyise kamuyi uMnumzana Obert Moyo uchaze ukuthi yena kalamazwi amanengi ongawakhuluma ngoba usakhala.
“Kuliqiniso sibili ukuthi umntanami ubhubhile kodwa okwakhathesi akukho okunengi engingakukhuluma ngoba ngisakhalela umntanami. Noma nje sebekhona abathi kuthiwa yibo abambuleleyo kodwa mina angikwazi lokho ngithi umntanami ufe ngendlela engazwisisekiyo ngoba ubengeke abulawe yikugudlwa yisivalo,” kuphetha uMnu Moyo.
