uMthunywa
YiNtatheli kaMthunywa
UMGADLI weHighlanders wakudala uBruce Grobbelaar usebike ukuba uzancedisa uHulumende wakuleli ukuphakamisa ezemidlalo.
UGrobbelaar, oleminyaka engu-60 yokuzalwa ubephetsheya kwelizwe okweminyaka elitshumi. Ubike ukuba uzaphenduka ngenyanga kaLwezi.
Ubikele intatheli eseNgilandi ukuthi ubelengxoxo loMongameli welizwe uEmmerson Mnangagwa mayelana ngesimo sezemidlalo. Uthe utshele uMnangagwa ukuthi uzaphenduka ekhaya abe yingxenye yabosaziwayo bezemidlalo abazaphathisa ukuthuthukisa isizwe.
Kubikwa uMongameli nguye otshayele uGrobbelaar ucingo, bobabili baxoxa okwesikhathi eside.
Ekhuluma lentatheli zephephandaba lase-United Kingdom, le-The Guardian, uGrobbelaar uthe uphenduka kuleli ezokhankasela ukukhuliswa kwemidlalo.
“Ngiyabuya ngoLwezi. Ngitshele uMnangagwa ukuthi ngizathanda ukuba ngincedise kwezemidlalo. Ngisalethemba elikhulu kulizwe leZimbabwe yikho ngifuna ukuthi ngincedise ukuze kube lentuthuko,” kutsho uGrobbelaar.
Abafakazi abaqotho abasebenzela uHulumende babikele uMthunywa kuliviki ukuba isizatho sokuphenduka kukaGrobbelaar sivela ekuthini sekube lenguquko kwezombusazwe kulandela ukukhethwa kukaMnangagwa.
Kuvele njalo ukuthi ukuqhatshwa kukaKirsty Coventry njengomphathi wezemidlalo sekujabulise inengi lezizalwane zeZimbabwe eziphatheka kwezemidlalo phetsheya.
Abalandeli bakaGrobbelaar bazakhumbula ukuba lo nguye unozinti owabasukumisa enkundleni ezinengi ekuHighlanders, kuLiverpool lakuqembu lesizwe amaWarriors.
Ngaleso isikhathi amaWarriors ayeqeqetshwa nguReinard Fabisch. Unozinti lo wabonakala kumidlalo engu-400 ekuLiverpool. Lakhathesi uphethe udumo ngokuba ngunozinti weLiverpool wokucina lokhe iqembu leli labayintshantshu yeligi yaseNgilandi ngesizini ka-1990. Kusenjalo, uGrobbelaar uselobe ugwalo mayelana lempilo yakhe ekunguqu langesikhathi ekhula kuleli. Ugwalo lolu, A Life In a Jungle, kubikwa luzatholakala kuleli kunsuku ezilandelayo.
Umdlali lo, obizwa ngokuthi ngu-Jungle Man kunguqu wasuka kuleli ngama-1990s esiyadlalela iLiverpool.
Ngaleyo minyaka wahlanyisa abathandi bakanobhutshuzwayo abacina sebelandela iqembu leLiverpool.
