uMthunywa
Ethel Ncube
ZISELE zitshwaqe imizimba izakhamizi zeMalundi eKezi ngesenzo sesinye isalukazi okubikwa sikhame umzukulu waso oleminyaka emithathu sambulala qede samfaka phakathi kwesikhwama sagqiba impahla phezulu.
Isalukazi lesi uSiqedeni Ndlovu oleminyaka engu-50 yokuzalwa kubikwa wenze lelihlazo ngempelaviki edluleyo.
UMthunywa uzwe ukuthi uNdlovu ubehlala lomzukulu wakhe oleminyaka emithathu, akwaziwa ukuthi kwasuka kwathini nanko phela wadobha ugodo wamgongoda ngalo wasemklinya ngaphambi kokuba afake isidumbu phakathi kukaTshangani bag agqibe impahla phezulu.
Kuzwakale ukuthi esekwenzile lokhu watshayela unina womntwana ucingo wathi kazothatha umntanakhe ngoba usembulele kodwa kakwazi ukuthi umbulaleleni.
Esinye isakhamuzi esikhulume loMthunywa uSimephi Dube uthe lokhu bethithibele ngesenzo sikagogo uMaNdlovu.
“Simadolonzima ngesiga sikagogo okhame umntwana oleminyaka emithathu ukuthi ubesengenwe yini asazi? Thina sezwa sokukhulunywa kuthiwa ugogo lo usebulele umntwana njalo umgcine phakathi kukaTshangani bag, asazi ukuthi wayefuna ukusithini isidumbu, mhlawumbe wayefuna ukuyasilahla khatshana.
“Wathi esembulele abantu abahlala eduze baqalisa ukungunguna bethi umntwana abasamboni, ungaphi yikho ukutshayela uyise ucingo wabuya wathola ugogo womntwana esezama ukuzibophela kodwa intambo yaqamuka,” kubika uDube.
Iphephendaba likazulu lixhumane lesikhulumi samapholisa eMatabeleland South uInspector Philisani Ndebele oveze ukuba udaba olunjalo lwafika endlebeni zawo.
“Udaba lukagogo obulele umntwana seludluliselwe emthethwandaba, alusekho ezandleni zethu,” kuphetha uInsp Ndebele.
