uMthunywa
YiNtatheli kaMthunywa
LO kungaba ngumnyaka wokucina wokudlala inguqu kumdlali oyimvimbi olodumo uGilbert Banda nanko usekhitshwe kuqembu leBulawayo City obekukhangelelwe ukuthi aqedise umdlalo wakhe kulo.
UMthunywa uncwetshwe indlebe ngabanye abadlali labafakazi abaqotho kuBulawayo City ukuthi isimilo sikaBanda kasizange sithabise umqeqetshi uPhilani ‘‘Beefy’’ Ncube.
Kubikwa umdlali lo wacelwa ukuthi agele ikhanda nxa efuna ukudlala kuqembu laMakhosi kodwa wala ukuthi ehlukane le-dreadlock lakhe.
Amakhosi lawo aseqalile ukugumula abadlali njengokwenziwa ngamanye amathimu aseqinisa amalungiselelo awo esizini yeCastle Lager eqala ngoMabasa.
“UBanda kukhanya kasoze azihluphe ngokuphenduka kuBulawayo City. Udaba olukhona yikuthi umdlali lo ubesexabana labaqeqetshi ngokuziphatha kwakhe. Esikuzwayo loba singelaqiniso lakho yikuthi ubetshelwe ukuthi akhiphe i-dreadlock,” kubika omunye wabadlali owesabe ukuqanjwa ngoba ethi laye engaxotshwa kuqembu.
Umqeqetshi uNcube walile ukukhuluma ngeqembu lakhe, ethi uphezulu kwamalungiselelo okubumba ithimu yakhe.
UBanda usebhode phose wonke amathimu amakhulu kumhlubulo ongezansi yelizwe. Udlale okwesikhathi eside engukaputeni weHighlanders, wavimba njalo lakuzimbamgodi zeFC Platinum. Ngesizini edluleyo uBanda ubetshibilikela iHow Mine. Esadlalela iHow Mine, waqeqetshwa nguNcube ngesizini ka2014.
Ngesizini edluleyo umdlali lo wabikela abalandeli bakhe ukuthi sekuseduzane ukuthi atshiyane lokukhaba ibhola ngoba ethi usemdala. Lonyaka umdlali lo uzabe eleminyaka engamatshumi amathathu lantathu yokuzalwa.
Ekhuluma loMthunywa, uBanda uthe usafuna ukudlala njalo bekungumbono wakhe ukuthi atshiye inguqu lonyaka. Ebuzwa ngodaba lokuthi bekuthiwa agele i-dreadlock, uBanda uxhamandile.
“Ngikhona kuBulawayo City loba nje ngibona angathi isizini le ngeyokucina ngidlala ibhola. Sengizangena esikolo futhi, mhlawumbe ngizame ukuthola isithupha sokuqeqetsha esicacayo.
“Okwama-dreadlock kuyahlupha ngoba angeke ngiwakhiphe. Kudala ngadlala inguqu ngile-dreadlock leli,” kutsho uBanda.
UBanda bekukhangelelwe ukuthi abambe ziqine emuva kuleliqembu elilabadlali ababalisi uTerrence Moyo, uBrighton Dube, Ndodana Sibanda, uZibusiso Sibanda, uTakunda Muzuva, uLewis Ncube, uXolisani Moyo, uInnocent Kutsanzira, uMkhululi Moyo loBrain Chikwenya.
