uMthunywa
Gladmore Ncube
KULENINA leTsholotsho esiqintini seDikili okubikwa langenelwa lidlalicatsha emzini walo laganyulwa isandla ngeviki edluleyo.
UNkosazana Charity Moyo kubikwa wangenelwa nguMnumzana Sibongumusa Nkawu endlini wamgamula isandla ngoba ezondele ukuthi kungani engamtshelanga ukuthi umkakhe usephendukile ekhaya.
UMthunywa ukhulumisane loMnumzana Ngwenya ongathandanga ukuveza ibizo lakhe lokuqala othe lokhu kulihlazo.
“UNkszn Moyo ubethandana loNkawu kungakho uthe umkakhe esephendukile ekhaya idlalicatsha lakhe lacunuka layamgamula.
“Ngeviki edluleyo ngoLwesihlanu emadabukakusa sezwa umkhosi omkhulu uMaMoyo ekhala edinga usizo ngoba eselimele.
“Ngavuka masinyane ngaqonda emzini wakhe ngahlangana lezinye izakhamizi samthola isandla silenga iminwe esithi ulinyazwe nguNkawu,” kutsho uMnu Ngwenya.
Intatheli ikhulumisane njalo lomunye umfakazi oqotho ongazivezanga ngegama obikele iphephandaba ukuthi uNkawu wayevele ekujongile ukukwenza lokhu ngoba wayehlezi ekhuluma ngakho nxa esethe wadla amabele.
“Vele mina akuzange kungimangalise ngitsho lakancane ngoba uNkawu ubefunga egomela esithi uMaMoyo kamazi kuhle, uyamdelela ngokwekela ukumtshela ukuthi umkakhe usezohlala ekhaya esuka koBulawayo,” kubika umfakazi lo.
Intatheli iphinde njalo yenelisa ukukhulumisana loNkszn Moyo ngaloludaba oveze ukuthi uyazisola ngokungathembeki.
“Ngibuhlungu kakhulu ngokungathembeki kwami kumkami. UNkawu wangigamula umkami ekhona kodwa wasuka ngoMgqibelo ekuseni waziyela koBulawayo engelandaba lokuthi ngilimele njalo wayethukuthele egane unwabu.
“Okunye okungizwisa ubuhlungu yikuthi laye lowo Nkawu owatshiya engilimazile wasuka wabaleka kaziwa ukuthi ungaphi,” kutsho uNkszn Moyo.
Imizamo yokukhulumisana loNkawu yehlule ngoba kuthiwa ngemva kwesiga lesi wahle watshona phansi njengomswenya kazange aphinde abonakale.
Mthunywa uphinde wazama imizamo yokukhulumisana loMnumzana Mpofu umkaNkszn Moyo kwehlula.
