uMthunywa
Cornelius Luphahla
IMADOLO nzima imuli yakoPhakathi esigabeni seGumede eLupane ngemva kokuba umalukazana wayo egamule waquma umntanakhe ikhanda qede wazigwaza isisu ngenxa yobukhwele bokuthi umkakhe ubesethandana lomnawakhe, uMthunywa uyakuveza lokhu lamhlanje.
Impicabadala le yenzakale ngoMgqibelo ntambama kuviki ephelileyo lapho uKeresia Hlabangani (32) othethwe nguPatrick Mlauzi (35) agamule khona umntanakhe olomnyaka owodwa andubana amqume ikhanda wasezigwaza esiswini ngoba umkakhe esethandana lomnawakhe oleminyaka yokuzalwa engu-17.
UMthunywa esizwa ngesihluku lesi uphuthume wayafika kule indawo wakhulumisana loNkosazana Melody Mpofu oyisakhamuzi sakule indawo ochaze ukuthi uNkszn Hlabangani wabulala umntanakhe ngendlela eyisihluku.
“UMaHlabangani okwenza wabulala umntanakhe yikuthi umkakhe wayesehlanyisana lomnawakhe engasamnaki. Indaba le kukhanya ibisimhluphile sibili ngoba ubesehlala exabana lomkakhe ukusa kwamalanga,” kutsho uNkszn Mpofu.
UMnumzana Cornelius Phakathi ongumalumakhe kaMnu Mlauzi ubikele intatheli ukuthi ngalelolanga umzukulu wakhe wasuka ntambama emzini wakhe watshiya umkakhe labantwana.
“Umzukulu wami wasuka esiza emzini wami watshiya umkakhe labantwana.
“Ukuthi umakoti wabulala nini umntwana asikwazi kodwa umntanakhe ofunda ugwalo lwesikhombisa nguye owafica unina segamule umntwana laye esezigwazile esiyatshintsha impahla njengoba wayeqeda kugeza,” kulandisa uMnu Phakathi.
Kubikwa umntwana lo ebona lokhu wahle wahlaba umkhosi ebikela abantu abahle babiza amapholisa athatha uNkszn Hlabangani amusa esibhedlela seSt Lukes njengoba wayesezigwazile.
Ebuzwa ngokuthi uMaHlabangani wabulala umntwana ngoba emunyu ngobudlelwano bomkakhe lomnawakhe uthe ngamanga lawo.
“Ukuthi uMaHlabangani wayengahlalisananga kuhle lomkakhe ngokuthandana lomnawakhe ngamanga aluhlaza tshoko. Ngabe kwakunjalo babengasoze bekele ukungibikela njengomalumabo, angazi ukuthi abantu bambangisani umzukulu wami.
“Ngendlela abakhuluma ngayo sokungathi yibo abamhlungileyo ukuba ehlelwe yisilingo lesi,” kutsho uMnu Phakathi.
UMnu Phakathi uqhubekele phambili njalo walandisa ukuba uNkszn Hlabangani wayengasaphathekanga kuhle engqondweni ngenxa yokufelwa ngumnewabo mahlayana yikho wenza isiga lesi.
“UMaHlabangani okwenza wabulala umntanakhe yikuthi wayengasaphilanga kuhle engqondweni. Ngitsho lokhu ngoba uyisemncane uRotched Hlabangani wathi besemfeni kamnewabo eGobhi ngoLwesihlanu wamehlisa emoteni kathathu ethi kangabuyi ekhaya ngoba wayesekunanzelele lokhu.
“Okunye njalo kuthiwa besendleleni wezwakala esithi ufuna ukwehla ngoba uhlezi endaweni yomuntu khona kungela owayehlezi khonapho bamalela abantu. Kusenjalo waphinda njalo wathi omunye umama owayehlezi emoteni ufuna ukumbhalela incwajana okwadala ukuthi abanini bomtshova lo bafonele umkakhe bemtshela ngokuthi umkakhe kasaphilanga basebemehlisela eLupane wazofika ntambama ekhaya.
“Lami ngakunanzelela ukuthi kasaphilanga kuhle ngoba umkakhe wathi emfonela ntambama wathi useSivuwe yena esemzini wami eGumede,” kutsho uMnu Phakathi.
Kuzwakale njalo ukuthi uNkszn Hlabangani wathi efika kumkakhe evela emfeni yomnewabo lo okubikwa wayefe ehlanza amathumbu wafika wathi ulande ukuzotshiya umntwana ngoba ubone ukuthi engabuya yedwa uzalahleka. Ekukhulumeni lokhu kukhanya kwamsolisa umkakhe wananzelela ukuthi umkakhe kasaphilanga ngoba umtwana lo owayethi ubezalahleka engabuya laye wayelomnyaka owodwa.
Ebuzwa ngale indaba umnawakhe kaMaHlabangani wale wemba phansi ukuba kukhona okutshaya amanzi phakathi kwakhe lomkadadewabo.
“Mina kangizange ngathandana losibali njalo kazake angikhombise ngakho lokhu okukhulunywa ngabantu ukuthi ngithandana laye ngamanga. Okunye njalo kangikaze ngizwe udadewethu exabana lomkakhe lokhu ngafika lapha ngo-2013,” kutsho untombazana lo.
Usobhuku wakule indawo uMnumzana Ronald Sibanda ubikele intatheli ukuthi indaba le ibathene amadolo.
“Indaba yenzakele sibili kodwa kukhanya uMaHlongwane okwenze wenza isiga lesi yikuthi ubesesangene emkhumbulweni ngokucabanga nzima ngomnewabo lo owafa mahlayana,” kuphetha uSobhuku uSibanda.
