uMthunywa
Cornelius Luphahla
ZITHITHIBELE izakhamizi zesigabeni sePhumula, eGwanda ngemva kokuba esinye isakhamuzi sakule indawo sigalule emfuleni safa ngesikhathi sivela etshwaleni.
Isiga lesi senzakale kuviki ephelileyo lapho uMnumzana Gift Ramnwana (74) ogalule khona emfuleni uPelele ngesikhathi evela natha utshwala ezitolo zeNyanda watholakala eganxele phezulu kwesihlahla.
UMthunywa uxhumane loMnumzana Joshua Ndlovu wathi uMnu Ramnwana wayedlule emini umfula ungelamanzi ngakho kungabe wayecabanga ukuthi lokhe ungelamanzi yikho wagalula.
“Ngokubona kwami uRamnwana njengoba wadlula uPelele engelamanzi ngesikhathi esiya etshwaleni ezitolo zeNyanda wathi esephenduka wangasananzeleli ukuthi kulamanzi njengoba kade sokusebusuku wasengena amanzi ahle amthatha njengoba wasuka esedakwe kakhulu,” kutsho uMnu Ndlovu.
Ekhuluma lentatheli uMnumzana Jabulani Nare uthe isidumbu sikaRamnwana basithola siganxele esihlahleni sinqunu.
“URamnwana sathi sisizwa kuthiwa kafikanga emzini wakhe sayamdinga ezitolo lapho ayenatha khona utshwala bathi usuke izolo ebusuku. Salandela unyawo lwakhe sabona luphelela ekhunjini lomfula sahle sabona ukuthi engabe ethethwe ngamanzi.
“Samdinga silandela umfula saqala sathola impahla zakhe zisezihlahleni sezidatshulwe ngamanzi. Ngemva kwalokho sayamthola eganxele phezulu kwesihlahla somdubi efile,” kulandisa uMnu Nare.
UNkosazana Judith Ramnwana oyisihlobo sikamuyi uthe uzwa ubuhlungu kakhulu ngokufa kukamnewabo waveza ukuthi umnawakhe uphose wagalula laye ngelanga kusifa umnewabo okuveza ukuthi ukhona obahlungayo.
“Mina ngizwa ubuhlungu kakhulu ngokufa komnewethu ngoba ufe kabuhlungu kakhulu sibili. Okungimangalisayo yikuthi kuthe mhla ezakufa umnawami wawela ebholohweni wasizwa ngabantu esegalula. Lokhu kuveza sobala ukuthi kulomuntu osihlungayo njengomdeni ngoba kwaphosa kwafa abantu ababili ngasuku lunye begalula emfuleni munye,” kuveza uNkszn Ramnwana.
Isikhulumeli samapholisa esabelweni seMatabeleland North uInspector Philisani Ndebele ebuzwa ngale indaba uthe indaba enjalo sebeyizwile njalo bakhuthaza uzulu ukuthi abantu bengabongena emfuleni kulezinsuku ngoba kuyingozi kakhulu.
“Indaba yokugalula kukaGift Nare emfuleni uPelele sesiyizwile ngakho sikhuthaza abantu ukuthi bengabochapha umfula ulamanzi ngoba kuyingozi kakhulu njengoba izulu lisina kangaka kulenzisuku,” kuphetha uInspctr Ndebele.
