uMthunywa
Thokozile Mbedzi
ZIKHUZA imihlola izakhamizi zesigabeni seMadlambuzi ePlumtree ngemva kokufa komntwana oleminyaka engu-8 ethiya inhlanzi.
Inkemenkeme le yenzakale ngeviki ephelileyo lapho uNjabulo Ngwenya (8) agalule khona emfuleni uNhomela ngesikhathi ethiya inhlazi.
UMthunywa uxhumane loMnumuzana Elias Ngwenya omunye walabo ababekhona ngesikhathi kukhitshwa umufi emanzini.
“Kangilankani ngesiga esisehleleyo njengezakhamizi, asazi ukuthi yisilingo bani sibili. Kwathi ngezikhathi zantambama uNjabulo loMkhokheli bethiya inhlanzi, uNjabulo wasebona inhlanzi enkulu waseseqela emanzini esithi ayigole engazi ukuthi sekuyikuhamba kwakhe.
“Omunye umntwana ayelaye oleminyaka engu-10 uthe ebona ukuthi omunye wakhe segalulile wagijima wazosibikela sahle saphuthuma lanxa sathola esefile kodwa senelisa ukukhipha isidumbu emanzini,” kulandisa uMnu Ngwenya.
UNkosazana Sibongokuhle Ndlovu ubikele uMthunywa ukuthi uzwa ubuhlungu kakhulu ngesiga lesi.
“Ngidabukile emoyeni ngokufa komntwana lo ngoba ufe kabuhlungu. Ngibona angathi kayisikho kugola inhlanzi nje kuphela ngabona kulokuhlungwa phakathi kwalesisiga njalo sonke njengomama esigabeni silahlekelwe ngumntwana,” kutsho uNkszn Ndlovu.
UMnumzana Elliot Ndlovu laye ugcizelele ukuthi kalankani ngesiga lesi njalo bahle babikela amapholisa sebekhuphe isidumbu emanzini.
Isikhulumi samapholisa esabelweni eMatabeleland South uAssistant Inspector Nkosilathi Sibanda ebuzwa ngale indaba uthe sebeyizwile njalo bakhuthaza uzulu ukuthi ananzelele abantwana ngazo zonke izikhathi ngoba indawo ezinengi izulu liyana. Isikhathi umntwana lo agalule ngaso besekuntambama, bekumele abe sengekhaya.
“Abantwana kumele bakhuthazwe ukuthi bengadlaleli emanzini ngoba bengehlelwa zingozi ezifana lale. Sicebisa abazali ukuthi babekwazi ukuthi abantwana bavikelekile sonke isikhathi ukuze bengehlelwa zingozi,” kuphetha uAsst Insp Sibanda.