uMthunywa
Fairness Moyana
KULENINA leHwange elibophise isithandwa salo lithi kasilihlawule imali engange $10 000 ngesizatho sokwephula isithembiso sokulithatha. Icala leli kubikwa liphethe lehlule ngoba ijaha lalo lifunyanwe limsulwa.
Umamangala uMusa Primrose Moyo umangalele uComfort Moyo obethandana laye njalo belomntwana ngesizatho sokumala ethi kaselasifiso sokumthatha yena wamthembisa ukumthatha.
Umamangala ubikele umthethwandaba ukuba ukwaliwa kwakhe ngumsolwa ayisikho ukuthi kungamenza aphelelwe empilweni njalo akumzwisi buhlungu kakhulu kodwa okumcaphulayo yikuthi umdlalisele isikhathi sokuthi ende emuntwini obengamthatha. Ubuye njalo wathi ucabangela ukuthi umkakhe usethole umasihlalisane yikho emalile.
Emaphepheni akhe umamangala uchaze ukuthi umsolwa baqala ukuthandana ngo 2011 basebethembisana ukuthathana ngakho wasemthatha esiyamtshengisa umalumakhe eVictoria Falls.
“Saqala ukuthandana ngo2011 kwathi ngoNhlangula ngomnyaka ka2013 sasuka-ke saya komalume njengomthetho owenziwa nxa kuthathwana,” kutsho uMamangala.
Kubikwa kwathi ngoNcwabakazi ngo2014 izinto zajika ngoba umsolwa wathi kasenelisi ukuqhubeka ethandana lomamangala.
“Kwathi ngo2014 uComfort wathi kasenelisi ukuqhubeka ethandana lami ngakho kungcono sehlukane ngoba kaselathando. Ngenxa yokuba wangiphambanisela impilo yami ngakho kufanele angihlawule imali engange $10 000 egoqela ukungidlalisela isikhathi sami,” kutsho uMaMoyo.
Kubikwa akucaci ukuthi kwahamba njani uMusa aze amangalele uComfort ngoba abazange babika ukuthi kwahamba njani mhla kuthethwa lelicala. Owayemele umsolwa uMnumzana Tonderai Mukuku oweMarondedze and Partners kubikwa wacela ukuba umamangala achaze ukuthi kwahamba njani ngalesosikhathi okuyikho okwadala ukuthi icala leli liphele ngoba kwatholakala ukuthi bebengomasihlalisane.
Umsolwa wachaza njalo ukuthi kusukela ngo2011 babehlala bonke ngokungekho emthethweni okwananzelelwa ngaphandle kokuba kuhlawulwe amalobolo.
“Umamangala lomsolwa bahlala bonke ngethuba bengakathathani ngakho ukwenda ngokungekho emthethweni kukhanya nxa amalobolo sekhutshiwe okuchaza ukuthi lokhu akusikho. Lokhu kufana lokwehlukana kwezithandani ezingathathananga.”
Ediliza imfuno yenhlawulo engange $10 000 umantshi uRosemary Dube uchaze ukuthi inhlawulo le ayikho emthethweni ngoba umamangala wahle wazendisa ngokungekho emthethweni ngakho indaba yokwephula isithembiso kayikho lapha.
“Imfuno kamamangala kayikho emthethweni ngoba babeyizithandani nje ngakho okokwephula isithembiso akukho lapha njengoba babengomasihlalisane bengalandeli umthetho oqondileyo. Yikho-ke okuzadala ukuthi umsolwa angahlawuli lutho kulelicala,” kutsho umantshi.
