uMthunywa
Mthokozisi Dube
UMQEQETSHI odumileyo wakweleBelgium uAdel Amrouche usetshengise isifiso sokuncedisa umqeqetshi weqembu lesizwe lenguququ amaWarriors.
UAmrouche useke wakhulumisana lenhlanganiso yenguqu yakuleli iZimbabwe Football Association (ZIFA) ngephupho lakhe lokukhokhela amaWarriors kumidlalo yokungena kuAfrica Cup of Nations 2017.
Undoda lo oke waqeqetsha iBurundi le Kenya uke wacela ukuyasiza ama Warriors kunyanga ezimbili ezedluleyo besiya kumidlalo yeCosafa Cup eyenzelwa kwele South Africa.
Abaseduze loAmrouche bathi lokho wayekwenzela ukwakha ubudlelwano leZifa.
Abalandeli bomdlalo wenguqu bangakhumbula ukuthi uAmrouche nguye owayezibambile kweleBurundi ize ibhuqe amaWarriors 2-1 ngoMbimbitho ku 2012.
Ngemva kokudanisa ama Warriors, uAmrouche wahle watshiya umsebenzi wakhe ayesehlale kuwo okweminyaka emihlanu ethi abakhokheli bomdlalo wenguqu eBurundi babengatshengisi ukutshiseka ngempumelelo yeqembu labo.
Exoxisana loMthunywa uAmrouche uthe uke wakhulumisana labeZifa bathembisa ukuthi bazamupha impendulo kodwa ulokhe elindile.
“Ngizimisele ukuncedisa yiloba ngubani oqeqetsha amaWarriors. Bengingela ndaba lemali ngoba ngabala emaphepheni ukuthi into azimanga kuhle kuZifa. Inhloso yami kanye lomcabango wami ubuyikuthi ngakhe ubudlelwano leZifa,” kutsho uAmrouche ekhuluma ekwele Belgium.
UAmrouche olesithupha seUefa Pro Licence useke wasebenzela iAl Jazeera.
Uthi isifiso sakhe sokuqeqetsha amaWarriors sivela ekuboneni ithalenta elilapha eZimbabwe.
Ubabaze kakhulu ngomdlali wakuleli oseBelgium uKnowledge Musona ethi uqakathekile kakhulu kuqembu lakhe iKV Oostende.
“Sengike ngabukela uKnowledge Musona, ulethalenta elimangalisayo umfana lo. Kungitshengisa ukuthi eZimbabwe kulabadlali abalethalenta elimangalisayo.”
Uthi umdlalo weZimbabwe uyamthokozisa lothando abantu bakuleli abalalo ngezenguqu lumupha intshukuntshu.
Umsebenzi kaAmrouche wokuqeqetsha wawukuma Harambee Stars iKenya.
Badlala imidlalo elitshumi lesithupha bengazange banqotshwe.
Bathe sebedliwa yiLesotho kwaba yikho ukuphela komsebenzi.
UAmrouche wathola inkezo ye CECAFA Senior Challenge ngomnyaka ka2013 eqeqetsha iKenya.
