uMthunywa
YiNtatheli kaMthunywa
LOKHU ingundabamlonyeni indaba yendoda eyabulala inhlathu ngokuyigwaza ngomkhonto efe isihanjwa yinto esanyoka phakathi komzimba eChisuma, eVictoria Falls.
Abangakibo kaBrian Ncube lokhe bedidekile ngendlela omunye wabo afe ngayo nanko phela kubikwa ibibonakala ihamba ngaphansi kwejwabu lakhe isabalala emzimbeni wakhe wonke obekubangela ukuthi abhinqilike ngobuhlungu okucine kubangela ukuthi afe.
Imbedumehlwana le yenzakale emavikini amabili adluleyo lapho uBrian Ncube agwaze khona inhlathu ngomkhonto yafa kwathi ngemva kwamalanga amabili yabonakala isihamba emzimbeni wakhe okubangele ukuthi acine esesifa.
UMthunywa uphuthume wayafika kule indawo wakhulumisana loMnumzana Blessing Munkuli ochaze ukuthi wayekhona mhla kubulawa inyoka le.
“Mhla inyoka le ibulawa ngangikhona yiloba nje kungayisimi engayibulalalayo. Kakusekuseni ngehola lesihlanu lapho esezwa khona izinja zikhonkotha saphuma sisiyaphosa ilihlo sathola inhlathu ithandele umvundla eceleni komuzi kaBrian abantu bahle bayihlasela uBrian yena wayiqedisa ngokuyigwaza ngomkhonto,” kutsho uMnu Munkuli.
Uqhubekele phambili wathi wethuka ngemva kwamalanga amabili esesizwa kuthiwa uBrian uyagula.
“Isimanga yikuthi kwathi kungoLwesibili ngezwa sokuthiwa uBrian uyagula uhanjwa yinyoka esayibulalayo.
Ngasuka-ke ngayambona njengesihlobo ngamthola elele phandle besithi utholakale elele ekuseni umkakhe akwaziwa ukuthi ungaphi.
“Kusenjalo ngamkhangelisisa ngayibona lami inyoka ihambahamba phakathi komzimba wakhe ngayibona engalweni kanye lasesiswini. Kwakuthi nxa ihamba abhinqilike ahlabe umkhosi aphinde akhamise njengenyoka,” kutsho uMnu Munkuli.
UMnu Obert Ncube ongumalume kamuyi laye uthe kalankani ngalesisiga.
“Lokhu ngakhotha udengezi angikaze ngikubone okunje. Mina umzukulu ngangimcine engaguli kodwa ngemva kokubulala inyoka kwahlala amalanga amabili nje wahle waqala ukugula kwangathi ngumuntu oselezinyanga egula.
“Wayeseqanda mo angathi ngumuntu osefile loba nje sasizama ukumthoba ngamanzi akhudumalayo akuzange kwasiza. Okungethusayo yikuthi ingalo agwaza ngayo inyoka yayingasasebenzi ngitsho.
“Noma nje sasibuza umkakhe ukuthi uphume njani phandle njengoba watholakala elele phandle kazange wacaca wathi laye umbone esephandle ekuseni,” kutsho uMnu Ncube.
UMnu Nephias Ncube omunye wabomalume bakamuyi uveze njalo ukuthi usesesabela abaseleyo.
“Ukubhubha kukaBrian kusizwise ubuhlungu sonke kodwa mina into engidlayo yikuthi mhlawumbe inyoka le ngeyomuntu okokuthi izabaqeda bonke abaphatheka ekuyibulaleni. Manje nxa kunjalo sizakuthini njengoba babebahlanu abayibulalayo njalo kungabantwabethu bodwa.
“Asisakwazi ukuthi senzeni sokuphezulu kwamandla ethu. Lokhu kwaziwa nguMdali,” kuphetha uNcube.
