uMthunywa
Langelihle Moyo
KULENDODA yeNyathi esigabeni sakoBadala eleminyaka yokuzalwa engu-62 ehlala lomkayo efe ngemva kokuzisika kubi iphuca inwele zensitha.
Isehlakalo lesi senzakale mhlaka 7 kuyonale inyanga ngehola lesithupha ntambama.
Kubikwa ngeSonto ngehola lesithupha ntambama, uWalter Lovemore Moyo oleminyaka yokuzalwa engu-62 wasukuma watshiya umkakhe uSukoluhle Khanye oleminyaka yokuzalwa engu-49 emkulwini, esiyageza.
Kubikwa uMoyo wathatha i-razor efuna ukuyakhipha inwele zensitha kodwa wasethatha isikhathi eside egeza okwenza umkakhe wacina esesola, wasemlandela ngemva kwemizuzu engamatshumi amabili.
Kubikwa unkosikazi wakhe waqala wambiza kodwa kazange athole impendulo wasevula wathola umkakhe elele phakathi kwethabhu kulegazi kodwa kungelamanzi.
Wambuza ukuthi kwenzakaleni, wasemlandisela ukuthi uzisikile ezama ukukhipha inwele zensitha. Uthe esebone lokhu wathatha umkakhe wamgijimisela esibhedlela seNyathi nanko wayesopha kakhulu embilaphini.
Ekufikeni kwabo esibhedlela kubikwa bafika bamthunga andubana bamfake le-drip. Kuthe ngehola lesikhombisa uMoyo wedlula emhlabeni elalisiwe esibhedlela.
Isikhulumi samapholisa eMatabeleland North uInspector Glory Banda uthe udaba lolu lwabikwa emapholiseni, athola le-razor ayeyisebenzisa.
“Amapholisa athola i-razor ayeyisebenzisa phakathi kwe-tub lapho okwakulegazi khona. Amapholisa aphinda ahlola umzimba kamuyi watholakala ulezititshi zokuthungwa ezine.
“Isidumbu sikamuyi sahanjiswa eUnited Bulawayo Hospital (UBH) ukuze kuyehlolwa imbangela yokufa. Amapholisa aqhubeka njalo echwayisa ngodabu lolu ngokugcweleyo,” kuphetha uInsp Banda.
