uMthunywa
Ethel Ncube
ZIKHATHAZEKILE ngempilakahle yazo izakhamizi zeMangwande eLower Gweru ngenxa yokoma kwezibholane kanye lempompi zamanzi esigabeni lesi njalo isimo lesi silakho ukubangela ukumemetheka kwemikhuhlane nanko phela lekilinika akusela ngitsho ithonsi lamanzi.
Kubikwa ikilinika yeMangwande isileviki isebenza ingelamanzi.
Udubo lolu kubikwa yingoma yesigaba sonke njengoba lezikolo kungelamanzi njalo lezibholaneni zezakhamizi osekusenza abantu banathe amanzi angahlanzekanga edamu okulakho ukubangela ukuqhamuka komkhuhlane wesihudo leminye.
Intatheli ixhumane loMnumzana Gerald Khumalo oyisakhamuzi kule indawo obike ukuba kuliqiniso ukuba ikilinika yeMangwande isebenza ingelamanzi.
“Sithwele nzima ngodubo lwamanzi, impompi azisaphumi lutho okutsho ukuthi awasekho. Ekilinika lapha amanzi ayimpilo njalo asetshenziswa njalonje. Amanzi sesiwathola khatshana lendawo esikuzo, kwesinye isikhathi sicina sisiyakukha amanzi angahlanzekanga edamu ukuze ayenathwa yizigulani lokuwatsha impahla zekilinika,” kutsho uMnu Khumalo.
Uqhubekele phambili waveza ukuthi balakho ukuhlaselwa yimikhuhlane etshiyeneyo ngokuswela amanzi ahlanzekileyo.
“Ukuswela amanzi lapha kungadala ukuthi kucine kuqhamuka eminye imikhuhlane etshiyeneyo efana lesihudo.
Kubomama abazithweleyo sokunzima kakhulu ngoba nxa bezobeletha sokumele babuye bethwele amanzi abo,” kubika uMnu Khumalo.
UMthunywa uxhumane lomunye umama osanda kubeletha ekilinika yeMangwande ozichaze ngokuthi nguNkosazana Simangele Mpofu oveze ukuthi abantu bathwele nzima ngenxa yokuswelakala kwamanzi ekilinika.
“Mina ngibelethe ngoMgqibelo omongikazi bathi ngihlale okwamalanga amathathu besakhangela umntwana ngacina ngicela ukuphuma isikhathi singakafiki ngenxa yodubo lwamanzi kule ikilinika.
“Kubomama abakhulelweyo kulobunzima ngoba kumele bayezikhela amanzi. Ukuhamba umango wokuya edamu uzithwele kunzima kakhulu,” kutsho uNkszn Mpofu.
Angazi ukuthi singasizakala njani sithole amanzi ahlanzekileyo eduzane ngoba abanye sebeze bekubona kungcono ukuthi babelethele emakhaya ngenxa yamanzi. Lokhu kodwa kuyingozi ngoba sihlala sikhuthazwa ukuthi siyebelethela emakilinika lapho okulabomongikazi abalolwazi olungcono,” kubika uNkszn Mpofu.
Iphephandaba likazulu lichazelwe ukuthi ukuswelakala kwamanzi endaweni sokubangele ukuthi abantwana bahambe esikolo bethwele izigubhu zamanzi ngoba ezikolo impompi sezomile.
