uMthunywa
Thokozile Mbedzi
ZINATHISANA itiye izakhamizi zeSinansengwe eBinga ngemva kokuba omunye untombazana edonsele unina edale lenduna emethesa ubuthakathi obumenza engendi.
Kubikwa ukuthi Getrude Mwinde umangalele unina uSophia Muchimba enduneni emethesa ubuthakathi bokuba uyamloya ukuba angendi ngemva kokutshelwa lokhu ngomunye umphurofethi.
Intatheli kaMthunywa ixhumane lomunye umakhelwane owayekhona mhla kuthoniswa icala leli uNkosazana Celina Mudimba oveze ukuthi kalankani ngesiga esenziwe nguGetrude othi unina uyamloya ngemva kokuba semkhulisile.
“Kangila nkani ngesiga esenziwe nguGetrude sokuthi unina uyamloya kodwa isimanga ngesokuthi kungakabuyi umphurofethi lo bebehlezi kuhle kungela hlupho.
Unina kamamangala uNkszn Muchimba ongusobhuku kulindawo ubelesithuli, lalamuhla inhliziyo yakhe idabukile.
“Mina ngokwami ngibona engani abaphurofethi laba yibo abaxabanisa abantu.
“Abaphurofethi laba bafuna ukuzithathela abantwana babantu bengalobolanga, yikho bexabanisa izimuli ukuze okwabo kuhambe. Mina ngibe lokuthaba ngoba induna kayizange ivumelane lobubi lobu, ihle yakhuluma edale ukuthi abaphurofethi laba bahamba bethathela abantu izifuyo zabo njalo lokuxabanisa izimuli.
“Induna inqume ukuba ihlawulise umphurofethi kanye lendodakazi le emangalele unina isithi yenzela ukuthi abantwana babekwazi ukuthi umzali uyahlonitshwa ngokwesiko, hatshi ukumdelela.
“Kuzamele uGetrude loMaGwaza bakhiphe inkomo yokugezisa uNkszn Muchimba ngokumgcona abamenza khona,” kulandisa uNkszn Mudimba.
UKhansila wakulindawo uMnumzana Elimon Mudenda ebuzwa ngodaba lolu uvumile wathi luthonisiwe edale lenduna yabo kodwa kube lihlazo elikhulu ukuba umntwana aduhiswe ngumphurofethi aze ahambise unina edale.
“Sibe lesehlakalo esilihlazo edale lethu lapho uGetrude adonsele unina edale lenduna emethesa icala lokuloya ngemva kokuba umphurofethi emtshele amazwi la.
Induna iphe isigwebo esihle kakhulu ngoba abaphurofethi laba sebedilize izimuli esigabeni sethu, kube kuhle ukuthi abagwebe inkomo.
Lokhu kuzakwenza ukuthi labanye babo bacine ukuhamba bechitha imizi yabantu,” kuphetha uMudenda.
