uMthunywa
Johas Moyo
KULESIKLIWI sendoda sesigabeni seMarambeni eSilobela esibotshwe yizakhamizi zakule indawo kulandela ukuzwa ukuthi sadlwengula umzukulu waso (15) simbophe umlomo ngapha simqamelise ingqamu okwabangela ukuthi azithwale, uMthunywa ukuzwile lokhu.
Isigebenga lesi esileminyaka yokuzalwa engu-28 esihlala ngaphansi kukasobhuku uMacacada senze ihlazo leli kunyanga eziyisithupha ezedluleyo.
Kubikwa indaba le iphumele egcekeni ngemva kokunanzelela kukanina kamamangala ukuthi ubengasamanga kuhle okuyikho njalo okwenze lezakhamizi zabakwazi ngendaba le.
Izakhamizi sezizwe lokhu ziphume ijumo zamdinga zaze zambona andubana zimuse emapholiseni.
UMthunywa uxhumane ecingweni lelinye ilunga lemuli elizibike ngokuthi nguDube nje kuphela oveze ukuthi umunyu ngodaba lokudlwengulwa komntwana eqameliswe ingqamu.
“Ngididekile ngoba abantwana kukhanya bengavikelekanga ezindlini lapha. Kambe umuntu engaze edlwengule umtakadadewabo yena ethethe? Into engidanisa kakhulu yikuthi wayemvale umlomo njalo emkhombele ngengqamu waphinda wamthembisa ukumquma umphimbo nxa ethe walokotha wanyenyezela abantu ngalokhu.
“Thina sibone ngomntwana esekhulelwe okuyikho okwenze waveza imfihlo,” kutsho uDube.
UMthunywa uxhumane njalo lomalumekazi ohlala lomamangala oveze ukudana ngokwehlela umzukulu wakhe.
“Ngilokudana ngilapha angazi lokuthi sizayithini indaba le,” kutsho umalumekazi lo.
“Ngihambe laye esibhedlela seRoma lapho afike wahlolwa kwatholakala ukuthi isisu sakhe sesilezinyanga eziyisithupha njalo bathe bazaphinda besibize sekumele udaba lungene emthethwandaba,” kutsho umalumekazi lo.
Ebuzwa ngaloludaba umamangala uveze ukuthi wayesesaba ukubikela abadala ngokwamehlelayo ngoba esesaba ukuqunywa umphimbo ngoba umalumakhe uvele uyisigebenga.
Imizamo yokuxhumana lesikhulumi samapholisa uInspector Joel Goko yehlule ngoba ucingo lwakhe lungadojwa.
