uMthunywa
Cornelius Luphahla
KAZILAMATHE izakhamizi zesigabeni seMabhonobono eLupane ngemva kokuba esinye isakhamuzi sakule indawo sibulele inkomo eyazibuyelayo sayidla qede inkomo zaso zatshaywa lizulu.
Isiga lesi senzakale kuviki ephelileyo lapho uMnumzana Gerald Bhebhe otshayelwe khona inkomo zakhe ezingu-11 yinkosazana okucatshangelwa ukuthi kungenxa yokuba wadla inkomo eyayizibuyele ingaziwa ukuthi ngeyangaphi.
UMthunywa ukhulumisane loMnumzana Dennis Nkomo oyisakhamuzi sakule indawo wathi uBhebhe udle inkomo le ngeKhisimusi kusisa ezakhe zatshaywa lizulu.
‘‘UBhebhe wahlaba inkomo le ngeKhisimusi njengoba yayisilesikhathi eside yafika emzini wakhe. Kuthe kusisa ezakhe ezilitshumi lanye zatshaywa yinkosazana zisesibayeni zafa zonke. Ngikhuluma nje khathesi usele lenkomo ezintathu kuphela kodwa lazo ngezizalwa yile eyazibuyelayo.
‘‘Lokhu kwenza sangathandabuzi ukuthi inkomo zakhe zaqedwa lizulu ngenxa yokudla umazibuyela lo,’’ kutsho uMnu Nkomo.
UNkosazana Sipho Masuku oyisihlobo sikaBhebhe ubikele intatheli ukuthi bathi besiyahlahlula ngokutshaywa kwenkomo lezi yinkosazana batshelwa ukuba livela enkomeni le eyadliwa nguBhebhe.
‘‘Njengoba kungavamanga lokhu okwenzakala kuBhebhe sasuka sayadingisisa kubosiyazi basitshela ukuthi izulu leli lathunyelwa enkomeni le eyadliwa nguBhebhe. Bathi kube yinhlanhla ukuthi lingatshayi umuntu ngoba bekufanele liqede labantu.
‘‘Okubuhlungu yikuthi umzawami kaselankomo khathesi asazi ukuthi uzalima ngani,’’ kuveza uNkszn Masuku.
Ebuzwa ngale indaba uMnu Bhebhe uthe inkomo le kayibulalanga kodwa yazifela njalo ufuna ukuzixotshela eguswini inkomo lezi ezasalayo zidliwe zimpisi.
‘‘Mina kangizange ngabulala inkomo yokuza kodwa yazifela nje igula. Okungizwisa ubuhlungu yikuthi singiqedele inkomo zami mina ngingazi lutho. Khathesi ngizazixotshela iganga zonke eziseleyo zidliwe zimpisi ngoba zingacina zibulalisa mina labantwabami,’’ kuphetha uMnu Bhebhe.
