uMthunywa
Blessing Moyo
UMCULO wezokholo ulandelwa linengi labantu kodwa kuyavela ukuthi abahlabeleli abanengi basilela usekelo lwemali ukuze bafeze amaphupho abo okujabulisa uzulu ngengoma zokholo.
Omunye wabahlabeleli bengoma zokholo odabuka ePlumtree esiqintini seNtimwe uNkosazana Zimiseleni Moyo ohlabela eselizweni leSouth Africa ubike ukuba udinga uncedo kubalandeli bakhe ukuze enelise ukusabalalisa ulwazi ngengoma zakhe ziphinde zidlalwe emisakazweni yelizwe kanye lokumabona kude weZtv.
UZimiseleni Moyo ulilunga lebandla le12 Apostle.
Ubike ukuba ulamadlalade amabili elakuqala ngelithi Masimbonge uJesu. Uthe lelidlalade lilengoma ezilitshumi. Elesibili ngelithi Ngibona Yena, lalo lilengoma izilitshumi. Kumadlalale akhe womabili usenelise ukwenza amavidiyo engoma zakhe, kodwa okumkhathazayo yikuthi uswela usekelo oluzaphathisa ukuthi umsebenzi wakhe ufinyelele ebantwini, ikakhulu labo abadinga usindiso.
“Ngicela uzulu jikelele angisekele njalo angincedise ukuze ingoma kanye lamavidiyo kufinyelele umphakathi elizweni lonke,” kutsho uNkzn Moyo.
Idlalade lakhe lakuqala amavidiyo akhona atholakala ebulenjini kuYouTube.
Umhlabeleli lo waqala ukucula amaphimbo amnandi ngo-2007.
Ubika ukuba kazange abuyele emuva kusukela lapho.
“Ngaqala ukuhlabela ngo-2007. Ngo 2014 ngaqala elami iqembu leThemba Labakholwayo ngilokhe ngihlabela ingoma zokholo.
Uphethe ngokuthi sewake wathola isicoco kwezokuhlabela.
“Ngithole isicoco ngoMbimbitho South Africa sokuba yiBest Female Artist, njalo sengenelise ukubhalisa eZimura kodwa angikenelisi ukuthi ngifinyelelise ingoma zami kuzulu.”
