uMthunywa
Cornelius Luphahla
ZIBUKELE ibhayisikopo yamahala izakhamizi zelokitshini leCowdray Park ngemva kokuba elinye inina lidakwe lazikhohlwa lathutsha endlini ekuseni liziqephuzela ligqoke iphenti lodwa zwi.
Isiga lesi senzakale ngoMvulo kuviki ephelileyo lapho uNkosazana Samukeliso Ncube athutshe khona endlini yakhe lomkakhe uMnumzana Thabani Ndlovu ekuseni ezigqokele iphenti ngemva kokudakwa yithathankawu, uMthunywa ukuzwile lokhu.
Esinye isakhamuzi esikhulume loMthunywa uMnumzana Meluleki Dube uthe uNkszn Ncube wabukhelela waze wazikhohlwa okwabangela ukuthi alale engekho endlini.
“UMaNcube wayethengisa utshwala ngapha ezinathela lapho okuthengiswa khona. Lanxa umkakhe wayelokhu emtshela ukuthi ekele ukunatha yena wakutshaya indiva lokhu.
“Ebusuku ngehola lika-11 umkakhe wasuka wabuyela endlini njengoba laye wayethengisa utshwala lobu yena wasala,” kutsho uMnu Dube.
Uqhubekele phambili wachaza ukuthi uMaNcube wadakwa waze wazikhohlwa wacina sengasenelisi lokuhamba.
“UMaNcube wacina engasenelisi ukuhamba thina samtshiya selele egcekeni khonapho. Into eyangimangalisayo yikuthi ekuseni ngezwa abantu bebanga umsindo eduze lendlu yami ngavuka ngabona uMaNcube sebemthandele ngelembu ngapho elandelwa ngabantu kuthiwa uthutshe ehamba nqunu,” kutsho uMnu Dube.
Kuzwakale ukuthi uNkszn Ncube wathi efika endlini yakhe umkakhe wambhaxabula embuza ukuthi ulele ngaphi kodwa isimanga yikuthi wathi kakwazi uzibone ekuseni senqunu ngemuva kwebhawa okuyikho okwacunula uNdlovu ngamandla.
Ebuzwa ngale indaba uMnumzana Ndlovu uchaze ukuthi ngeke akhulume lutho ngoba sebehlukana loMaNcube.
“Mina okwakhathesi akulanto engingayikhuluma ngoba ngemva kwesiga lesi esangehlelayo ngahle ngehlukana loMaNcube. Ngakho kangiboni kudingeka ukuba ngikhulume ngakho lokhu,” kutsho uMnu Ndlovu.
Imizamo yokukhulumisana loNkszn Ncube yehlule ngoba ucingo lwakhe belungangeni.
