uMthunywa
ELIKA zulu liza lazo ezimnandi maviki wonke osekwenza abanengibazwakale bebabaza besithi ezikaMthunywa ngezimnandi zodwa yikudlakwedlebe kuphela.
Kule iviki sitshintshe ukwenza akusiwo mculo wansuku zonke esiwethulayo lamhla kodwa ngumculo wentokazi enhle ecula sangilosi. UNatsisai Taaliah Mudzamiri ukhiphe idlalade elimnandi okumangalisayo ngenyanga ephelileyo eEagle Life Assembly. Kumsebenzi wakhe lo ubexhaswa ngumfundisi wakhe uDokotela Prophet Blessing Samuel Chiza osephathise abaculi abanengi ebandleni lakhe ukuthi bakhiphe amadlalade. Umculo kaTaaliah ubusisa ngitsho labangasindiswanga ngoba uhlabela ngendlela yohlozoni oluphezulu. Okulandelayo yingxoxo ebusisayo phakathi kukaNatsisai (NM) loGladmore Ncube (GN) intatheli kaMthunywa.
GN: Wagqululezwa yini ukuze ungene kwezomculo we gospel?
NM: Ukuhlabela bengivele ngikwenza ngisesikolo emfundweni ephansi. Bengihlabelela kamnandi ngitsho lasenkonzweni. Iphimbo lami yilo elangenza ukuthi ngingene kwezemiculo ngoba ngizizwa ukuthi ngiwalandelisana kamnandi amazwi ami nxa ngicula.
GN: Njengoba usithi uhwatshe idlalade akuchathekele uzulu ukuthi libizwa ngokuthini idlalade lakho?
NM: Idlalade lami libizwa ngokuthi ‘Spirit of the Lord’ njalo lilengoma ezingu-9. Ukuqala kwami ukusebenzela idlalade leli ngalisebenzela inyanga ezingu-6 ngabe sengilihwatsha ngokusemthethweni mhlaka 14 Mfufu eZimbabwe International Trade Fair. Idlalade leli limumethe ingoma eziduduza abahluphekileyo lokubonga uMvelinqangi ngobuhle asenzele bona ezimpilweni zethu.
GN: Walithatha ngaphi idlabuzani elakwenza wenelisa ukukhupha idlalade ngesikhathi esifitshane kangaka?
NM: Okwangenza ngathatha idlabuzani lokuthi ngisebenze ngamandla yisifundo engasithola ebhayibhilini encwadini ka 2 Samuel 2:23. Okunye njalo yikuthi bengincediswa nguFungisai onguye engicula ngilethemba lokuthi lami ngilenye ilanga ngizahlabela njengaye.
GN: Njengomhlabeleli uvame ukuhlabelala ngaphi uzazisa ebantwini ngalokhu odume ngakho?
NM: Ngeke ngitsho ukuthi sengibhode endaweni ezinengi ngomculo wami ngoba vele ngimutsha kwezomculo ngakho ke abanengi abakangazi. Ngiqale lonyaka ukungena ngokuqinisekileyo kwezomiculo kodwa ke njengoba sengenelise ukukhipha idlalade sengilungiselela ukuhlabela kumicimbi embalwa engizayihamba ngoMpalakazi ngikhulisa igama lami.
GN: Abalandeli bakho ubathembisani ngengoba uchaza ukuthi usasebenzela ukukhulisa igama lakho kwezemiculo?
NM: Abalandeli ngithi kibo abathembe kimi ngoba kukhulu engibalungisela khona okuzabasondeza duzane leNkosi.
Okwakhathesi ngisalungisa ama-vidiyo edlalade leli. Okunye njalo sengikhulume labahlabeleli abangaphandle kwelizwe ukuthi ngisebenzisane labo.
GN: Bunzima bani ohlangana labo emculweni wakho?
NM: Ubunzima engihlangana labo zikhathi zonke ngobemali ngoba ayeneli engiyitholayo ukuthi ngenze into zami zonke ziphelele njalo balutshwane abangixhasayo emculweni wami.
GN: Njengoba usuke wakuzwa ukuthi kunjani ukuba phakathi kwezomiculo nkuthazo bani oyipha abasangena kwezemiculo?
NM: Angikabile sikhathi esiyangaphi ngiphakathi kwezemculo kodwa engingakukhuthaza abasangena yikuthi bakholwe emsebenzini wabo njalo babe lethemba ukuthi loba kunzima njani bazafika kuphela ekucineni. Phezulu kwakho konke okuqakathekileyo yikuthi nxa ufuna ukuphumelela sebenza gadalala.
