uMthunywa
EZIMNANDI kazipheli kuphephandaba likazulu nanko phela maviki wonke lihlala liphethe amajaha lamantombazana angena kuvungame uzulu kwezomculo. Phela kule iviki lize lengadlangadla yejaha elitshaya i-rhumba kunyikinyeke phansi.
Kambe kungaba ngubani umculi wodumo lo ngaphandle kukaNtandoyenkosi Ndlovu odume ngokuthi nguKing Marabha. Kayigidi nje indoda le yenza izimanga. Ungakhutheki, nansi ingxoxo ejulileyo phakathi kwentatheli yephephandaba likazulu uCornelius Luphahla lalelijaha uNtandoyenkosi Ndlovu (NN):
CL: Akutsho jahelibanzi ukuthi kungani wakhetha ukucula umculo we-rhumba njengoba imiculo iminengi kangaka?
NN: Okwenza ngakhetha ukucula i-rhumba yikuthi ngakhula ngiwuthanda umculo lo kusukisela ngisafunda e-primary njalo ngangisenelisa kakhulu ukuwugida. Lokhu kwenza kwaba lula kimi ukuthi ngicule wona njalo kwenza ngicule kamnandi ngoba ngisenza into engiyithandayo.
CL: Uze ucule umculo lo wakhangwa yibaphi abaculi njalo wawuqalisa nini ukuwucula?
NN: Abaculi abangikhangayo kulo umculo we-rhumba ngabeqembu leNdolwane Super Sounds okuyibo engakhula ngifisa ukucula njengabo ngoba babengijabulisa kakhulu. Ngalokhu kuthe ngo2015 ngahlangana leqembu elibizwa ngokuthi Amasinamuva okuyilo engacula lalo ngasengisuka kulo ngabumba elami ngo2016 ngalibiza ngokuthi Ntando Marabha Ndlovu and the Royal Sounds.
CL: Lokhu wasungula iqembu lakho sowakhipha amadlalade amangaki jahalakithi njalo uvame ukudlalela ngaphi ingoma zakho?
NN: Njengomculi osasungula sengakhipha idlalade elilodwa engilikhiphe emavikini amabili adluleyo elilesihloko esithi Iphithuli. Lelidlalade lilengoma eziyisithupha njalo ngihlabela ngihlanganisa isiNdebele lesiKhiwa ukuze labo abangezwa isiNdebele bazwe ezesiKhiwa.
Ngalokhu ingoma zami ngivame ukuzidlalela kweleSouth Africa kodwa ngiyake ngizidlale kwelakithi nxa ngithe ngavakatshela khona. Khathesi ngikwelakithi eTsholotsho ngakho lakho ngisazobadlalela ingoma zami.
CL: Abantu bathini ngomculo wakho njalo ukhangelele ukubenzelani lonyaka?
NN: Abantu bayawuthakazelela kakhulu umculo wami, bawamukela ngezandla zombili njalo bathi ngiqhubekele phambili ngibajabulisa. Ngalokhu lonyaka ngibathembisa ukuqhubeka ngibadlalela ingoma zami ukuze bahlale bejabulile kanye lokubavakatshela endaweni ezehlukeneyo ngibazwisa idlalade lami elitsha.
CL: Bunzima bani oyake uhlangane labo kwezomculo njalo nkuthazo bani oyipha abaculi abasasungula?
NN: Ubunzima engiyake ngihlangane labo kwezomculo yikuswela imali yokuzithuthukisa njengomculi osasungula.
Ngalokhu kubaculi abasacathula ngithi kababambelele kwezomculo bengadeli ngoba vele kunzima.
