uMthunywa
YiNtatheli kaMthunywa
UFELIX CHINDUNGWE usecabange ukuthatha umhlalaphansi kwezenguqu.
UChindungwe ubedlalela iqembu leTsholotsho FC kulisizini kulandela ukukhitshwa kwakhe kuqembu leHighlanders.
Ukutshiya kwakhe inguqu kumangalise abakhokheli beTsholotsho ababike ukuba lumdlali bacina ukumbona enkundleni yokulolonga kudala.
Kubikwa lokhu wavuma ukudlala eTsholotsho, uChindungwe ubelivelakanci enkundleni.
“UChindungwe ucele ukuphiwa incwadi yakhe ye-clearance. Akwenzileyo kufana lokuthi wazixotsha. Iqiniso yikuthi besingazi ukuthi ungaphi. Simbone esezocela incwadi yakhe. Kade samcina,” kubika uMlamuli Phiri umgcinisihlalo weTsholotsho FC.
Kuthiwa lomqeqetshi omutsha uDarlington Dodo kamazi uChindungwe.
Akula msekeli loba umbukeli wenguqu yeCastle Lager ongafakaza ukuthi usakhumbula ebona uChindungwe etshibilika kulisizini.
Kubikwa phambili kokuba uChindungwe “abaleke emsebenzini” iTsholotsho yayisibeke isinqumo sokuthi akhitshwe eqenjini.
Isizatho esikhulu esidale ukuthi labaqeqetshi beTsholotsho bakhululeke ngokusuka kwalumdlali yikuba lumdlali “ubesenza okwakhe” enkambeni njalo ubesekhetha ukungayilolonga labanye.
“Njengeqembu elihloniphekayo, iTsholotsho FC ayivumelani labadlali abenza okwabo enkambeni. Siliqembu elilomthetho elilande ukuzoncintisa linqobe kuligi yePSL, kubika uPhiri.”
UChindungwe ubedlalela iHighlanders engukaputeni wayo njalo ubizwe yiTsholotsholo kulandela ukukhitshwa kwakhe ehlelweni lwabadlali beBosso. Akula enye ithimu eyadinga ithalenta lakhe ngaphandle kweZiqholo zeZhwane. Ebuzwa ngalokhu uChindungwe uthe akazi lutho.
Ucingo lwakhe belungasabambeki ngemva kwalokhu.
