uMthunywa
Gladmore Ncube
KULENDONDA yeGokwe eMbungu esitshiye izihlobo zikhakhamele nanko phela icatshise umntakamfowabo qede yathi imuse lapho athwasiswa khona.
UMnumzana Lovemore Chiriso obehlala lomntwana lo kubikwa nxa ebuzwa ukuthi umntwana wamusa ngaphi nanko phela kabonakali umane athi wamusa lapha azathwasiswa khona.
Intatheli ikhulumisane lomalume walumntwana uMnumzana Elijah Mpofu othe kuliqiniso ukuthi umzukulu wakhe kakho ekhaya kuthiwa wayamthwasisa.
“Umntwana lo ubehlala loyise omncane onguye othi umntwana wamusa endaweni ayaziyo yena yedwa ukuze ayothwasiswa. Okwenza ezinye izihlobo zithi umcatshisile yikuthi wakhetha ukumthwasisa engazange abikele abazali bakhe ngitsho lokwazisa sona isihlobo esisodwa.
“Abazali balumntwana bebefuna ukuyamangala emapholiseni kodwa-ke ngesiko umntwana nxa kuyikuthi uyethwasiswa kulemikhuba elandelwayo ukuze kungabi lenkinga ezimlandelayo yikho nje savumelana njengemuli ukuthi indaba le ibanjwe yithi kuphela,” kuchaza uMnu Mpofu.
Intatheli ikhulumisane loyise walumntwana uMnu Edmore Chiriso othe akumphathanga kuhle ukuthi azwe kuthiwa umntanakhe seyethwasa etshelwa ngabantu umfowabo engamtsheli.
“Akungiphathi ukuthi ngihlangane lomuntu wasekhaya erenkini yakoBulawayo angimbuze ukuthi sewathwasa waqeda yini umntwana mina njengoyise ngingazi.
“Abadala bathe umntwana nxa eyethasiswa akumelanga abantu bazihluphe ngaye kodwa okungixakayo yikuthi angitshelwa ukuthi ungaphi. Okunye njalo okungicunulayo yikuthi angifuni umntanami abe yinyanga ngoba mina ngingumuntu wenkonzo,” kuchaza uMnu Chiriso.
Intatheli ikhulumisane njalo loMnu Chiriso umathwasisa othe isiko lakibo kalivumi ukuthi akhulume ngodaba olufana lalolu.
“Ngesiko lakithi kuyazila ukuthi ngikhulume ngodaba olunjengalolu emuntwini ongasowemuli,” kuchaza uMnu Chiriso.
