uMthunywa
Blessing Moyo
KUDABA olusegudwini emphakathini weMberengwa kulendoda eleminyaka engu-23 efe ngemva kokuhlahlelwa ngehloka ekhanda ngenye kubangwa intombi, uMthunywa ukuzwile lokhu.
Kubikwa uPrince Ncube ohlala esiqintini seDugwe ngaphansi kwenduna uBangwe, eMberengwa ufe ngemva kokuhlaselwa nguAnele Sithole bebanga intombi emavinkilini eMasase Business Centre, khonale eMberengwa.
UMthunywa uzwe ukuthi mhlaka 15 kuyonale inyanga ababili laba babenatha ebhawa efanayo baze babe lokungazwanani kubangwa intombi.
Kuzwakale ukuba ababili laba baphuma phandle, ekuphendukeni kwabo ngemva kwemizuzu ethile, uSithole wadobha ihloka ayelifake ngaphansi kwebhentshi wahlahlela ngalo uNcube endlebeni yesandleni senxele kanye wamphinda futhi entanyeni andubana acele ezinyaweni.
UNcube wagijinyiselwa esibhedlela seMasase andubana adluliselwe esibhedlela seGwanda kodwa wedlula esendleleni yokuya khona.
Amapholisa abikelwa ngecala leli ayachwayisisa asebopha uSithole.
uInspector Emmanuel Mahoko
Isikhulumi samapholisa eNkabazwe uInspector Emmanuel Mahoko uqinisekise ngesehlakalo lesi.
“Amapholisa axwayisa uzulu ukuthi baxazulule inkinga ngokukhulumisana bangaze basebenzisa udlame ngoba ukusebenzisa udlame kudala umonakalo omkhulu kakhulu abanye bacine belahlekelwe yimpilo,” kuphetha uInsp Mahoko.
