uMthunywa
Ethel Ncube
KUSIGA esihlasimulisa umzimba kulomfana weTasanarago eMberengwa otshaye unina waze wafa andubana azame ukumngcwaba eyedwa.
Indaba le yenzakale kuviki ephelileyo lapho uNkosikazi Grace Zhou ethe efika esivandeni wathola umntanakhe ongumfana uTimothy Zhou wamtshaya wambulala wasezama ukumngcwaba khonapho kodwa kwehlula.
Kubikwa uTimothy ubesegebhile igodi lokungcwabela unina kodwa kwasekuthutsha uyise uPhilip Zhou wahle wacela ezinyaweni njalo akwaziwa ukuthi waqonda ngaphi.
Kuvele ukuba umsolwa uTimothy ubeselamalanga elala esivandeni engalali ngekhaya njalo ngesikhathi etshaya unina, unina wahlaba umkhosi edinga uncedo kodwa abazosiza bathi bezofika unina wayevele esefile njalo esezama ukumngcwaba yedwa.
Kubikwa uTimothy wathi ebona abantu befika wahle wabaleka.
Umzimba kamuyi wathwalelwa esibhedlela seZvishavane ukuze siyehlolwa ukuthi ubulewe yini.
UMthunywa uxhumane lesikhulumi samapholisa eMidlands uInspector Emmanuel Mahoko oveze ukuba udaba olunjalo walwamukela.
“Udaba olunjalo silutholile sicela ololwazi kumbe ozwe udletshana ngokuba umetheswacala ungaphi azise amapholisa aseduze laye ukuze abotshwe,” kuphetha ulnsp Mahoko.