uMthunywa
Thokozile Mbedzi
ZILOKHU zinkemile izakhamizi zesigabeni seDwalala Village 15 eWest Nicholson ngemva kokuba enye indoda ibulele umkayo kubangwa ukuthi uthe ilivila ngesikhathi behlakula emasimini.
Umetheswacala uPhineas Vhuku oleminyaka engu-75 uhlahlele umkakhe uShingairai Vhuku ngekhuba ngeviki ephelileyo.
Kuzwakale ukuthi ababili laba abahlala ngaphansi kwenduna uMarupi babesemasimini behlakula ngehola letshumi ekuseni uPhineas wasesithi usediniwe usefuna ukuphumula umkakhe waseqala ukuthetha ethi ulivila okuyikho okwabangela ukuthi bacine besilwa.
Kubikwa uNkszn Vhuku wadobha ikhuba watshaya umkakhe ngalo emhlane, umkakhe wasemhluthunela lelo khuba wamtshaya ngalo kanye esiphundu walimala.
Ababili laba kubikwa bahamba enkambeni yamapholisa eseduzane yeMasase andubana baye esibhedlela seMasase. Ekufikeni kwabo esibhedlela lesi badluliselwa njalo eGwanda.
Kubikwa indoda yelatshwa yakhitshwa esibhedlela kodwa uNkszn Vhuku waphinda wadluliselwa njalo esibhedlela seMpilo koBulawayo lapho afika wabhubha khona mhlaka 1 kuyonale inyanga.
Omunye wabomakhelwane uNkosazana Sibongile Mathe uthe lokhe belesithuli ngesiga abahlangane laso.
“Lokhe sikhakhamele ngesenzo semuli yakoVhuku okumele ukuthi aluba yibo abakhuza abasanda kuqala imizi.
“Ukuziphatha kwabo kusidanisile kakhulu, kumele ukuthi babe sebekwazi ukuzithiba hatshi ukuthi baze bafike kusimo sokulimazana size sibe lesidumbu phansi. Loba wayesezondile ukuthi unkosikazi wakhe uthi ulivila kodwa wayemele azithibe njengomuntu omdala,” kulandisa uNkszn Mathe. Isikhulumi samapholisa esabelweni seMatabeleland South uInspector Loveness Mangena ebuzwa ngodaba lolu uthe solufikile ewofisini yabo.
“Sithanda ukukhuthaza uzulu ukuthi nxa kulokungazwanani adinge usizo lwabaphathi bezigaba loba amapholisa hatshi ukuthi sicine silahlekelwa yimpilo ngoba umuntu kuthiwe livila nje,” kuphetha uInsp Mangena.
