uMthunywa
Thokozile Mbedzi
KULENDODA yeTsholotsho edingwa ngamapholisa ngoba isetheswa icala lokubulala intombi yayo ezithweleyo.
Umetheswacala okungasatholakalanga igama lakhe kubikwa walanda intombi yakhe, uTabona Nleya (32) obefundela ububalisi eJoshua Mqabuko Nkomo Polytechnic eGwanda kumaviki amabili edluleyo kibo eBambadzi ePlumtree wafika wambhaxabula ngenduku umzimba wonke kanye lekhanda andubana adliwe ngumswenya.
Izakhamizi zakule indawo zibikele uMthunywa ukuthi ngemva kokuxabana kukamuyi lentombi yakhe bacina besilwa lanxa kungasatholakalanga isizatho sengxabano yabo.
UMthunywa uxhumane loThandiwe Nleya ongudadewabo kaTabona oveze ukuthi kalamathe ngesenzo sejaha lomnawakhe.
“Silokhu sikhakhamele ngesibindi sendoda le elande umnawami yazombulalela ngekhaya ezithwele.
“Kasikwazi ukuthi ababili laba babebangani kodwa indoda le yabulala umnawami isihluku. Kukhanya indoda le yiyo eyamithisayo lanxa ibengakabuyi ukuzovela.
“Isiphithiphithi sonke lesi senzakala phakathi kwamabili okwenza abadala bezwa yikuthi uTabona wahlaba umkhosi okwenza abadala bezwa basebephanga bathi bayemsiza kodwa wayevele eselimele kakhulu,” kulandisa uThandiwe.
“UTabona wathwalelwa esibhedlela sePlumtree lapho abafika bamdlulisela eUnited Bulawayo Hospitals wafika walaliswa ku-intensive care unit okwamalanga ayisithupha.
“Bambelethisa ngokumhlinza kodwa usane lwedlula kwathi yena wabhubha mhlaka 21 Mpalakazi. Lokhu kube lusizi kithi abemuli ngoba besikhangelele ikusasa elihle kuTabona,” kugcizelela udadewabo uThandiwe.
Esinye isakhamuzi esiziveze ngokuthi nguQhubekani Ngwenya uthe lokhu bethithibele njengezakhamizi ngokwehlela imuli yakoNleya.
“Sithithibele njengezakhamizi ngalesi simanga esisehleleyo. Lanxa sazama ukudinga ijaha likaTabona ngesikhathi abantu bephaphatheka bemgijimisela esibhedlela sehluleka ukusibona.
Uthe bacabangela ukuthi kungenzeka ukuthi lelojaha lingabe lahle lachapha umngcele laya kweleBotswana ngemva kokwenza icala leli.
Isikhulumi samapholisa esabelweni seMatabeleland South uInspector Philisani Ndebele ebuzwa ngale indaba uthe sebeyamukele njalo bakhuthaza uzulu ukuthi nxa elenhlupho adinge uncedo emapholiseni kumbe baye ku-counselling kulokulwa.
“Indaba yenina elitshaywe yisithandwa salo sesiyamukele. Sithanda ukukhuthaza uzulu ukuthi nxa kulokungezwani phakathi kwabo ekuhlalisaneni babuye enkambeni yamapholisa bazodinga uncedo kulabo ababona ngobudlelwano.
Balakho njalo ukuba kubakhokheli bezigaba kumbe baye ku-counselling nxa belenhlupho ukuze bengangeni engozini ezifana lale,” kuphetha uInsp Ndebele.
