uMthunywa
Ncekwenhle Ncube
ZIZE zibelethene kumdlali kanobhutshuzwayo olodumo uBruce Kangwa mhla benqotshwa ngabafana beChicken Inn nanko phela uphinde wagqekezelwa indlu yakhe watshontshelwa inqwaba yemali kanye lamanyathela akhe okugiqa inguqu, uMthunywa ongelampontshi ukuzwile lokhu.
Lindabamlonyeni itshiye abalandeli bakaMantengwane bezonde begane unwabu mhlaka 3 kunyanga kaNtulikazi ngelanga iHighlanders ingqikilana leChicken Inn eMagumeni eBarbourfields lapho isela elingazakaliyo elangena endlini kaKangwa latshontsha imali ebalelwa kumadola angamakhulu amane lamatshumi ayisificaminwe mibili lanhlanu ($485).
Iphephandaba lizwe ukuthi umagqekeza kukhanya ngumuntu ololwazi kakhulu ngendlu kaKangwa njalo utshontshe ama-boots abiza ikhulu lamatshumi amahlanu amadola ($150).
Omunye umfakazi oyisihlobo sikaKangwa ongathandanga ukuqanjwa ngegama uvumile ukuthi lindaba yenzakala mhlaka 3 Ntulikazi njalo bazimisele ukwenza konke okusemandleni abo ukuze lesisigilamkhuba sibanjwe njalo sijeziswe.
“Umuntu otshontshileyo kukhanya ngumuntu ololwazi ngokwenzakala ngakithi, ngikhuluma nje yindaba esesiyibikile amapholisa kanti njalo lathi sizenza noma yini ukuthi ajeziswe ngumthetho,” kufunga umfakazi lo.
Iphephandaba likazulu lixhumane loKangwa yena ovumileyo ukuthi indaba enjalo yenzakala endlini lapho ahlala khona eTshabalala noma nje engasandanga ngamazwi ngoba ematasatasa ngokulungiselela umdlalo wabo wangempelansonto.
Intatheli kaMthunywa ikhulumisane loMelusi Golide Tshuma umlandeli omkhulu weBosso okhulume ngamazwi avutha amalangabi ngesiga lesi esehlele umdlali wabo abamthanda kangaka.
“Engifuna ukukuzwa yikuthi lumuntu otshontshele uKangwa ubonakele njalo ujezisisiwe njalo kumele achaze ukuthi iboot leli ubelitshontsheleni phela ngeke sazi abantu bagcwele ukuganga kobuthakathi lezinsuku,” kuphetha uTshuma.