uMthunywa
Musa Janga
KULENDODA yeKumalo koBulawayo emiswe phambi komthethwandaba weTredgold kuviki edluleyo isetheswa icala lokutshaya kanye lokuhlukuluza uyise isithi yenza lokhu ngoba uyaloya.
UDenford Mapako oleminyaka yokuzalwa engu-42 ubotshelwe ukutshaya uyise uSolomon Paul Mapako oleminyaka yokuzalwa engu- 74 ongumamangala kulelicala.
Umtshutshisi kulelicala uNkosikazi Grace Zhou, ubikele inkundla ukuthi mhlaka 9 Mpalakazi nyakenye ngezikhathi zantambama umetheswacala lomamangala babendawonye endlini lapho ababalokungezwanani.
Kubikwa umetheswacala waqala ukuthethisa umamangala emhlambaza ethi uyaloya, ufuze unina owafa eloya ngemva kwalokhu wasemtshaya ngamampama kanenginengi.
Lokhu kwabangela ukuthi umamangala ayebikela amapholisa.
Kubikwa umetheswacala ngokufika emzini kayise wayesephula umthetho weProtection Order eyathathwa nguyise.
UMantshi uNkosazana Nyaradzo Ringisai uthe umetheswacala ulecala lokungalandeli umthetho awuphiwa yi-protection order owokuthi angasondeli kumamangala wasesedlulisela phambili icala lakhe kunyanga ezayo.