uMthunywa
Ethel Ncube
ZINATHISANA itiye izakhamizi zeBinga eChisipale ngemva kokuba omunye undoda ebingelelwe ngumangoye waqaleka.
Isiga lesi senzakale ngempelaviki lapho uMnumzana George Ngwenya ethe evela kudla amabele wadibana lomangoye wambingelela wahle waphambana.
Ekhuluma loMthunywa uMnumzana Thelumusa Sibanda owayekhona ngesikhathi kusenzakala isiga lesi.
“Ngilapha ngilesithuli ngengakubonayo ngawami la. Sasivela natha sabona kulento emhlophe ethutshayo mina ngangisithi ngumvundla. Ngabona sekuseduze ukuthi ngumangoye ngezwa esekhala eseceleni kwethu wathi kuNgwenya “sabona Sitshela”.
Ngethuka ngezwa inwele ziphakama ngathi ngithi mehlo suka ngabona umngane wami esewele phansi esethule zwi. Ngahlaba umkhosi ngoba ngingaselamandla okuhamba kwabuya omunye ubaba egijima wamthela ngamanzi alesawudo yikho ukungani uyaphaphama kancane,” kubika uMnu Sibanda.
Ekhuluma lentatheli omunye wezakhamizi uMnumzana Hlelani Cele oveze ukuba lindaba iyisimanga kakhulu kibo.
“Lokhe ngathwetshulwa yingwe ngiyaqala ukuzwa kuthiwa umangoye uyakhuluma. Mina ngezwa ngomkhosi ngagijima ngayafika khona ngathola uNgwenya ethule zwi ephansi enganyikinyeki simncweba evele ekhanya engezwa lutho. Kukhanya wathi eqeda ukubingelelwa wethuka wahle wawa,” kutsho uMnu Cele.
Iphephandaba likazulu likhulumisane loMnumzana George Ngwenya owabingelelwa ngumangoye ovumileyo ukuba kwenzakala.
“Angilankani ngilapha ngokubingelelwa ngukiti. Sasivela natha ngabona kusithi bayibayi into emhlotshana isiza kithi kanti ngumangoye uthe efika kimi wathi ‘sabona Sitshela’ ngehluleka lokuthi ngenzeni ngaqaleka, ngabona ngoba ngathi ngivula amehlo ngazithola sokugcwele abantu sengimanzi nte,” kuphetha uMnu Ngwenya.
