uMthunywa
Cornelius Luphahla
ZIKHUZA imihlola izakhamizi zesigabeni seMalaba eLupane ngemva kokuba enye indoda yakule indawo eyaliswe ngunina ukuyakhelwa umfowabo amanzi ibhuzwe zinyosi zaze zabulala ubabhemi wayo ngesikhathi ikhela umnewabo amanzi.
Isiga lesi senzakale kuviki ephelileyo lapho uMnumzana Mbonisi Mhlanga asile ngokulambisa ngemva kokuhlaselwa zinyosi, ekhela umnewabo uMnumzana Edwin Mhlanga amanzi.
Kucatshangelwa ukuthi inyosi ezibulele ubabhemi lo ngezikanina uNkosazana Siphephile Dlodlo ngoba ubengafuni ukuthi ayekukha amanzi.
UMthunywa ukhulumisane loMnumzana Albert Mafu oyisakhamuzi sakule indawo wathi laye kalankani ngenyosi lezi ngoba yena wazibona zihlasela uMbonisi zitshiya abantu bonke ababekule indawo.
“Mina kangilankani ngenyosi lezi ezaluma uMbonisi. Isimanga yikuthi ngazibona sezimluma kuphela labobabhemi bakhe ayebabophile enqoleni kodwa akula omunye umuntu ezamlumayo noma nje kwakugcwele abantu kuleyondawo.
“Lokhu kwangitshengisa ukuthi zinyosi zomuntu sibili ngoba akulanyosi ezingahlasela umuntu oyedwa emphakathini,” kutsho uMnu Mafu.
UNkosazana Lindiwe Mpala ongumakhelwane uthe inyosi lezi zazingezikanina kaMhlanga ngoba wayemtshelile ukuthi angayakhela umnewabo amanzi uzazibonela ngoba umnewabo wathi uyaloya.
“Mina ngiyakukholwa sibili ukuthi inyosi lezi zazingezikaMaDlodlo ngoba kwathi ngesikhathi uMhlanga esuka esiyakhela umnewabo amanzi unina wayala kodwa yena wahamba ngenkani. Ngalesosikhathi esehamba wathi uzazibonela endleleni samangala sesimbona eselethwa ngabantu bethi ulunywe zinyosi zabulala ubabhemi oyedwa.
“Kukhanya uMaDlodlo uyalwa ngoba uEdwin wathi uyaloya kungakho umthumela ondofa abatshaya abantwabakhe,” kutsho uNkszn Mpala.
Ekhuluma lentatheli uMnu Mhlanga uvumile ukuthi wahlaselwa zinyosi kodwa kakwazi ukuthi ngezikabani.
“Kuliqiniso sibili ukuthi ngahlaselwa zinyosi ngisikha amanzi kamnewethu emgodini kodwa inyosi ezangihlaselayo kangikwazi ukuthi zazivela ngaphi njalo zingezikabani. Noma nje ngasuka ngixabene lomama kodwa ngeke ngitsho lutho ngakho,” kutsho uMnu Mhlanga.
UMnu Edwin Mhlanga ebuzwa ngale indaba uthe yena ngeke akhulume lutho ngonina ngoba uyamesaba.
“Mina ngeke ngikhuluma lutho ngendaba elomama phakathi ngoba ngiyamesaba njalo ngimazi ngcono kakhulu kulabantu bonke abalapha esigabeni,” kutsho uMnu Mhlanga.
Ebuzwa ngale indaba uNkszn Dlodlo uthe yena ufuna ukubona labo abathi nguye owathumela umntanakhe inyosi.
“Mina ngifuna ukubona labo abakutshela ukuthi yimi engithumele umntanami inyosi, okunengi ngeke ngikukhulume,” kuphetha uNkszn Dlodlo.
