uMthunywa
Cornelius Luphahla
ZIBAMBE oluphuphumayo izakhamizi zesigabeni seSibangani eLupane lapho amanye amanina esithenjini adinde khona umkawo amkhumula amazinyo kubangwa ukuba ubesehlanyisana lomazakhela.
Impi le yenzakale ngoMgqibelo kuviki ephelileyo lapho uMnumzana Limukani Mpofu abhuqwe khona nguNkosazana Siphiwe Hlabangani loNkosazana Lillian Nkomo kabuhlungu bebanga ukuba ubesethandana loNkosazana Amanda Ncube.
Kubikwa uMnu Mpofu ulabantwana abayisikhombisa lamakhosikazi akhe la njalo kasabananzi ngenxa kamazakhela lo okuyikho okudale impi kulaba.
UMthunywa uxhumane loNkosazana Jenipher Maphosa oyisakhamuzi sakule indawo wathi uMnu Mpofu ubeselesikhathi eside ethandana lalelinina njalo ubengasawahloniphi amakhosikazi akhe.
“UMpofu ubesengasahloniphi omkakhe ngoba kakho ngitsho loyedwa obengakwazi ukuthi uthandana loMaNcube.
Bekuthi noma kusemini libalele ubathole bebonke koMaNcube njalo loMaNcube ubezikhulumela ethi semthethe uMpofu.
“Indaba yabo le silesikhathi eside yaqala njalo bekukhanya ukuthi lokhe ikhula ngamandla okudale ukuthi amakhosikazi akhe azonde amtshaye,’’ kutsho uNkszn Maphosa.
Ekhuluma lentatheli uMnumzana Gibson Nyathi uthe yena wezwa ngomsindo wagijima wathola uMpofu sewele phansi edakiwe omkakhe bemtshaya kabuhlungu waselamula.
“Ngibambe oluphuphumayo mhlanokhuya ngoba ngezwa umsindo komakhelwane ngagijima ngathola uMpofu sewele phansi omkakhe bemdinda ngezikhuni seze wakhumuka amazinyo amabili aphambili. Ngabalamula nzima sengincediswa ngabantwabakhe kwaba yikusila kwakhe.
“Okwenza amanina la amtshaya kakhulu uMpofu yikuthi wayedakwe kakhulu ngakho wayengenelisi ngitsho lokuzivikela njalo kodwa wayekhuluma kubi,’’ kuveza uMnu Nyathi.
Ebuzwa ngale indaba uNkszn Nkomo uthe okwenza batshaya umkabo yikuthi bezwa ubuhlungu ngoba engasancedisi imuli yakhe ngalutho sesebenzela komazakhela.
“Okwenza sabopha iqhinga elokutshaya umkethu yikuthi kasihloniphi sehlala komazakhela. Okungizwisa ubuhlungu kakhulu yikuthi wenzenje kasancedisi ngalutho imuli yakhe khonapho uyazi ukuthi yisikhathi sendlala.
“Konke akutholayo usekusa koMaNcube khonapho abantwana bebulawa yindlala njalo esazi ukuthi akulakudla,’’ kutsho uNkszn Nkomo.
UNkszn Hlabangani uthe khathesi bakhangelele ukuthi bayehlasela uMaNcube nxa eqhubeka ethandana lomkabo.
“Okwakhathesi sikhangelele ukuthi umazakhela lo angaqhubeka ethandana lomkethu siyehlasela yena okuzwayo ukuze ayicine into yakhe. Okubuhlungu yikuthi watshiya umendo esenzela ukuzochitha imizi yabantu.
“Lapho sibili kungcono amapholisa asibophe ngoba singathula singafelwa ngantwana ngendlala,’’ kuveza uNkszn Hlabangani.
