uMthunywa
Nomthandazo Ndlovu
KULEJAHA lesigabeni seTshokotshoko eBeitbridge elibhuqe uyise kubangwa ukuthi uthengise izifuyo zakhe engamtshelanga.
Limbedumehlwana yenzakale kumaviki amabili aphelileyo lapho uMnumzana Takalani Muleya atshaye khona uyisemncane uMnumzana Dingumuzi Muleya ngenxa yokuthi wathengisa inkomo zakhe esidla imali yena eseGoli.
Ekhuluma loMthunywa umakhelwane kaDingumuzi uthe isenzo sikaTakalani silihlazo.
“Mina angazi ukuthi abantwana bakulezi insuku sebengenwe yini, umuntu asiphakamise sibili isandla etshaya umuntu omdala kulaye futhi enguyise.
“UTakalani yena usebenzela eGoli, ulokuthumeza imali esithi uyisemncane amthengele inkomo, inkomo sezikhona kodwa ezinye bezizala amathole amaduna uMuleya wathi uzamtshintshela amnike amathokazi wasethengisa amajongosi akhe, asazi ukuthi omtshelele eceleni ngubani othe inkomo zakhe ziyadliwa.
UMthunywa uzwe ukuthi uTakalani wafika emzini kayisemncane wamkhwelela ngesitilobho kwaba luthuli kwaze kwalamula omakhelwane.
Ebuzwa ngodaba lolu uTakalani uthe uzwa ubuhlungu ukuthi umuntu abemethemba kangaka umlahlisile.
“Ngizwa ubuhlungu kakhulu ngoba ngisebenze nzima ukuze ngibe lenkomo lezi, nxa ngibuya ekhaya zikhathi zonke ngithola isibaya sami singakhuli kodwa abafana abelusayo bangitshela ukuthi ziyazala.
“Nxa ngimbuza ubabomncane uthi yena ezinye ziyaphunza ezinye wathengisa ezinduna uzangitshintshela kodwa nxa ngisithi angitshengise lawo mathokazi azangitshintshela ngawo kasazwakali. Kungizondise kakhulu lokhu ngacina sengisenza into engalunganga engizisola ngayo ngoba mina ubaba sewabhubha ubabomncane nguye osengubaba kodwa ungiphatha njalo,” kutsho uTakalani.
UDingulwazi yena uthe uzwa ubuhlungu kakhulu ngento ayenziwe ngumntakamnewabo ngoba ubesithi uyamnceda.
“Mina umfana lo bengisithi ngiyamnceda, isibaya sikhula ngenkomo ezinsikazi bengisithi ngizamtshintshela ngimnike amathokazi kodwa ngimangele sesithi ngidla inkomo zakhe.
“Inkomo zakhe angizidlanga zikhona, njalo ngizamnika zona, sizakhulumisana ngumntanami lo uzakhuzwa langabadala bemuli ngeke siyikhiphele phandle, kuzasiyangisa lokhu esigabeni,” kuphetha uDingulwazi.
