uMthunywa
Cornelius Luphahla
ZIBAMBE oluphuphumayo izakhamizi zesigabeni seJanke, eNkayi ngemva kokuba enye indoda idinde unina kabuhlungu ngomphini wepiki yamnyelisa ingalo ithi uhlupha umkakhe ngokumbalela ukudla.
Insumansumane le yenzakale ngoLwesihlanu kuviki ephelileyo lapho uSotsha Tshuma (22) otshaye khona unina uNkosikazi Siphetho Tshuma (66) ngomphini wepiki wamnyelisa ingalo ethi uhlupha umkakhe ngokumbalela ukudla kanye lokukufihla, uMthunywa ukuzwile lokhu.
Intatheli ixhumane lesinye isakhamuzi sakule indawo uNkosazana Soneni Ndlela ochaze ukuthi indaba le uyayazi njalo wayekhona mhla lokhu kusenzakala.
“Mina indaba yokutshaywa kukaMaDube ngumntanakhe ngiyayazi njalo ngangikhona mhla isenzakala. Ngathi ngizihlalele ngisapheka ntambama ngezwa sokungumsindo ethi uhlupha umkakhe ngokumfihlela ukudla abuye njalo ambalele ethi uyakudlalisa kakhulu,” kutsho uNkszn Ndlela.
Uqhubekele phambili njalo wachaza ukuthi yena wayesapheka ntambama ngethuba indaba le isenzakala ngakho wezwa sokungumsindo.
“Indaba le ngiyayazi njalo mhla isenzakala ngezwa sokungumsindo kuntambama ngagijima ngayafika khona ngathola sokugcwele abantu uMaDube esewele phansi. USotsha yena wayesesidla ubhedu ethi unina uyamdelela ngoba uhlupha umkakhe ethi untshontsha ukudla akufihle endlini yakhe.
“Okunye njalo wathi unina uyakhuluma kakhulu ngokudla lokhu, kafuni ukuthi umkakhe apheke uthi uqeda impuphu,” kuchaza uNkszn Ndlela.
Kuzwakale njalo ukuthi uSotsha lo ubevele emhlupha unina nanko phela kubikwa ubemtshontshela imali yakhe ayithunyezelwa ngabantwabakhe abaseGoli kanye lokumthethisa nxa edakiwe.
Omunye wabantwana bakaMaDube uNkosikazi Simiso Mthethwa uchaze ukuthi ubuhlungu ngokutshaywa kukanina njalo unina lokhu egula.
“Ngizwa ubuhlungu ngokutshaywa kukamama ngumnewethu ngabe ngangikhona mhla etshaya ngangizamgamula sibili uSotsha. Ngikhuluma nje umama lokhu elalisiwe esibhedlela seSt Lukes kusukela ngoLwesihlanu kuviki ephelileyo. Okuhle yikuthi uSotsha ngambophisa khathesi icala lakhe alikathoniswa,” kuphetha uNkkz Mthethwa.
