uMthunywa
Johas Moyo
KULENDODA yeLubu eBinga emiswe phambi komthethwandaba wakule indawo isetheswa icala lokubhaxabula umkayo ithi uyadelela ngoba emuphe ukudla emile.
UMilson Mudimba Ncube oleminyaka yokuzalwa engu-41 umiswe phambi kukamantshi uNkosikazi Aileen Munamati kuviki ephelileyo esetheswa icala lokubhaxabula umkakhe uLucia Munsaka mhlaka 11 Nhlolanja.
Umtshutshisi kulelicala uMnumzana Bruce Maphosa ubikele inkundla ukuthi ngalelolanga umsolwa wafika emzini wakhe phakathi kwamabili evela khelela umaphephethwa engaphandlwanga.
Kubikwa umamangala waqhubela umkakhe ukudla kodwa kazange aguqe njengensukwini kanti yayisiwuchithile umuthi inkonyane nanko phela umsolwa wathi lothu wadobha isigodo esiqatha wambhaxabula ngaso umzimba wonke samuntu obhula amabele.
Inkundla izwe ukuthi ngenxa yokubhaxabulwa lokhu umamangala walimala umlomo lentamo okuyikho okwenza umsolwa wabotshwa.
Ebuzwa ngumantshi umsolwa ukuthi kungani watshaya unkosikazi wakhe wathi wacunulwa yikudelelwa akwenziwa ngunkosikazi wakhe.
Umantshi ukhuze umsolwa ukuthi angaphindi ahlukuluze unkosikazi wakhe andubana amuphe isigwebo sokuyapika entolongweni inyanga ezilitshumi lambili andubana azesule ngoba unkosikazi wakhe esecele ukuthi inkundla imxolele.
Kungakho-ke umsolwa ukhangelelwe ukuthi ayesebenza kungela mbadalo esikolo seMansenya Primary eLubu okwamahola angu-200.