uMthunywa
Listen Ndlovu
AMAPHOLISA esabelweni seManicaland achwayisisa ngendoda ebhaxabule umkayo ngogodo kubangwa umlayezo ovela kumnewabo othi “ngiyakukhumbula,” ahle athi yibufakazi bokuba umkakhe uthandana lomnewabo.
Indoda le okutholakale ukuba ngu-Enock nje kuphela evela eNyanga ngaphansi kwenduna uKatirere kubikwa ibhaxabule umkayo kulandela ukwamukela umlayezo kumakhalekhukhwini mhlaka 4 Nkwenkwezi ovela kumnewabo.
Kubikwa uEnock wathi evela gamula inkuni kwangena umlayezo kumakhalekhukhwini wakhe ovela kumnewabo owawusithi “ngiyakukhumbula” yena wahle wathi lumbiko ubhalelwe umkakhe, uPauline Marombedza ngoba eyake asebenzise umakhalekhukhwini wakhe.
Khonokho wathi khwatshu walanda umkakhe engasadlanga nkotshana wafika wambuza ngomlayezo lo waseqala ukumtshaya ngamampama lezibhakela andubana adobhe ugodo ambhaxabule ngalo ethi uthandana lomnewabo.
Kubikwa uMarombedza walimala ekhanda, ingalo lomzimba wonke.
Kubikwa eqeda ukwenza lokhu uEnock wahle wadliwa ngumswenya.
Intatheli ikhulumisane lesikhulumi samapholisa eManicaland uInspector Nobert Muzondo obike ukuba indaba le isifikile kibo.
“Indaba le isifikile kithi kuqhutshwa uphenyo. UPauline uthwalelwe esibhedlela seElim Mission Hospital lapho elatshwa khona.”
“Amapholisa axwayisa umphakathi ukuba uxazulule indaba ngokuthula engasebenzisi udlame.
“Amapholisa acela umphakathi kulabo abangabe belolwazi lalapho okulo Enock babikele amapholisa aseduze labo,” kutsho uInsp Muzondo.
