uMthunywa
Thokozile Mbedzi
KULENINA elileminyaka engu-25 elitshiye izakhamizi zelokitshini lePumula koBulawayo zithwele imikhono ekhanda kulandela ukubulala lungcwabe usane egumeni, uMthunywa uyakuveza lokhu lamhlanje.
URejoice Mabute Mathwasa wenze inkemenkeme yendaba le ngoMgqibelo ngehola lika 2 emini, kuviki ephelileyo.
Kubikwa uRejoice obesebenza endlini kaNkosikazi Phiri wathi umhelo usuqalile wala wabheja ukuthi asiwe esibhedlela.
UMthunywa uzwe ukuthi uRejoice wazibelithisa endlini encane ngezikhathi zemini qede wayagebha igodi egumeni wangcwaba usane lolo eselubulele.
Umqatshi kaRejoice uNkkz Phiri uthe wamangala ethola egumeni lakhe kume i-ambulensi.
“Ngathi ngithutsha ngabona kume i-ambulensi ngamangala ngacabanga ukuthi mhlawumbe umntwana kasezwa kuhle ngingazi ukuthi uRejoice useyenze okunye.
“Mina bengivele ngingazi lokuthi uzithwele ngoba ulomzimba,” kuchaza uNkkz Phiri.
Kubikwa uRejoice wathi ebuzwa ukuthi umntwana ungaphi wathi kuphume amanzi kuphela.
“Abe-ambulensi bathi bebuza uRejoice ukuba okuphumileyo kungaphi yena wathi akula lutho oluphumileyo kuphume amanzi kuphela ngakho bamthwala baya laye esibhedlela seMpilo.
UNkkz Phiri uqhubekele phambili esithi ngelanga elilandelayo ekuseni umkakhe wavuka ebhoda egumeni engazi ukuthi uzahlangana lesimanga nanko phela wahle wabona lapho uRejoice ayengcwabele khona usane lwakhe.
“Ngilokhu ngethukile ngesibindi sikaRejoice ngoba bengimtshiyela abantwana bami, nxa esenelisa ukubulala owakhe pho abami-ke?
Uzangenzela okukhulu okungelamkhosi,” kulandisa uNkkz Phiri.
Kubikwa amapholisa abikelwa ngendaba le.
UMthunywa wenelise njalo ukukhuluma loMnumzana Phiri yena ochaze ukuthi waqala ukusola esebona imilayezo eyathunyelwa ngelinye iloja labo liveza ukuthi uRejoice isisu sibuhlungu.
“Kwangalela ukuthi ngikwamukele ukuthi uRejoice angathi kuphume amanzi kuphela kodwa imilayezo iveza ukuthi uzithwele.
“Ngenxa yesizatho lesi ekuseni ngelanga elilandelayo ngavuka ngaqonda phandle ngadingisisa lapho okulenhlabathi khona ngoba iguma lethu lifakwe isamende. Ngathatha ipiki ngagebha kabili kathathu ngahle ngahlangana lenyama engingazange ngizizwisise ngahle ngatshiya ngayabikela amapholisa,” kulandisa uMnu Phiri.
Omunye udadewabo kaRejoice okutholakale ukuthi nguNaMaMpo nje kuphela uthe ubengakwazi ukuthi umnawakhe uzithwele.
“Mina bengingacabangeli lutho ngoba umnawami uyisidudla njalo kangihlali laye isikhathi eside. Wenze okunye sibili uRejoice, ngoba usengcolise umuzi wabanikazi. Abadala sokumele basukume phansi babuye bazowugezisa lazo izinto zinzima kangaka,” kulandisa uNaMaMpo.
Ngesikhathi abantu bebuthene kuzwakale amanye amanina esithi uRejoice uvele kakuqali ukwenza into enje ngoba wake wakwenza futhi esahlala eKwekwe wabaleka wabuya koBulawayo.
Imizamo yokukhuluma lesikhulumi samapholisa koBulawayo yehlule kwaze kwafika isikhathi sokudindwa kwephepha.
