uMthunywa
Yintatheli kaMthunywa
IZE yabanjwa indoda ebisihluphile ngokuhlala ijola labafazi babantu esigabeni seZimpompini eZhombe nanko phela ibanjwe emzini wenye indoda izikhohlisa lomkayo yazama ukuzivikela ngokuthi ibidinga inkomo zayo.
Umsolwa uLizwe Nduna ubanjwe xhaka ezikhohlisa lomfazi kaMthabisi Bhebhe wahle wabaleka.
UMthunywa uxhumane loMnu Bhebhe obethukuthele wabika ukuthi lalamuhla ulokhu emunyu ngalokhu akwenziwa nguLizwe wengezelela wathi udaba lwabo lwasiwa kusobhuku njalo ubaba ozala umsolwa uthembise ukuhlawula ngenkomo ezimbili ukuze agezise umuzi wakhe.
“Ngilapha angazi lokuthi ngenzeni, ngizwa ngilokuthukuthela ngaphakathi. Okwenziwa nguLizwe lomkami kulihlazo elesabekayo. Phezu kwalokhu kwenzakala emzini wami. Yikudelela bani okungaka?
“Ngangihlala ngisizwa abantu besithi umkami kathembekanga ngisithi basenga ezimithiyo kodwa kuze kwavela ukuthi ngempela akaziphathanga nanko phela ngimbambe khonapha emzini wami.
“Ngilokudana okukhulu ngalokhu okwenziwe linina engilithetheyo bengingakucabangeli lokhu kodwa amehlo ami aze avuleka ngesikhathi kutheleka indoda egqoke ukhabhudula yahle yaqonda ekamelweni okubonisa ukuthi kuyinjayelo yakhe.
“Umkami wethukile wahle wavuma ukuthi bebeganga,” kutsho uMnu Bhebhe
UMthunywa uxhumane lomsolwa obike ukuthi yena kazingeni indaba lezo ngoba wayesiyadinga inkomo njalo kathandani lomfazi womuntu.
“Ngangisiyadinga inkomo zami ngasengibona angani izulu laselifuna ukuna ngasengingena emzini kaBhebhe, ngangingazi ngicatshe endlini yokulala ngangisithi yindlu yokuphumula,” kutsho uNduna.
UMthunywa uxhumane njalo losobhuku wakulindawo uMnumzana Mabutho Zikhali obike ukuthi udaba lolu lusezandleni zakhe njalo basalulungisa njengoba ubaba kamsolwa evuma ukuhlawula, phezu kwalokhu abakonkosikazi kaBhebhe kumele bahlawule njengoba bondla umuntu owehlulekileyo ukuziphatha” kutsho uMnu Zikhali.
Umalume kaNkosikazi kaBhebhe uMlungisi Tshabangu ubike ukuthi yena ulenhloni ngokwenziwe ngumntanabo njalo kusamele bayegezisa umuzi wabantu ngehlazo leli.
