uMthunywa
YINtatheli kaMthunywa
Izalukazi lamaxhegu sezincwebisana igwayi njalo zivusana amavuko ngodaba olutshiye umuntu wonke engelankani eGwanda esigabeni seSilonga lapho elinye inina litholakale lithe khwimilili ligqoke isudu yalo yokuzalwa komakhelwane.
UAgnes Gumede, 57, utholakale emzini kamakhelwane wakhe uGivemore Chuma, 73 entubeni yomuzi mhlaka 29 Mabasa.
Umfakazi obikele iphephandaba likazulu ngodaba lolu uPardon Mlilo uveze ukuba uGumede watholakala entubeni yomuzi wakoChuma ebhunyumunyu.
“Ngesikhathi uGumede etholakala enqunu koChuma, kwabizwa isigaba sonke ukuze sizezibonela umhlolo lo njalo laye wayesecocobisile ngenxa yenhloni ngoba akekho owamnika lelembu nje lokuthi azivale ubunqunu,” kuchaza uMlilo.
UMthunywa uxhumane loMnu Chuma yena oveze ukuba isenzo sikaGumede lesi kasimphathanga njalo simtshayise ngovalo ngoba ubengakukhangelelanga kumakhelwane wakhe.
“Lokhu ngitshe amathe ngesenzo sikamakhelwane wami, ngiyazi ukuthi ubezoganga kuphela emzini wami.
“Kambe umuntu uyabe edingani emzini ongasi wakhe engavunulanga? Khona kowakho umuzi ungaphuma yini ungagqokanga?” kulandisa uMnu Tshuma.
Uqhubekele phambili wathi indaba le useyidlulisele kusobhuku ngoba yena isiphezu kwamandla akhe.
UMthunywa uzwe njalo udletshana lokuthi uGumede kaqalisi ukubonakala emizini yabantu eze ngoba nyakenye uke wabanjwa njalo komunye umakhelwane ekusimo esifanayo.
Kuzwakale ukuba nyakenye khona wahlawuliswa imbuzi ezimbili ngemva kokucela uxolo.
UMthunywa uxhumane njalo losobhuku wesigaba lesi uGilbert Nyathi yena oveze ukuba uGumede usewugile kakhulu umkhuba wakhe ngakho kuzamele indaba yakhe iye enduneni.
“Ukuxhwala kukamama lo kukhanya kuyaphambili kulokuthi kube nganeno, kungakho akukho engingakutsho ngendaba le, ngoba sengiyisa ezandleni zenduna ukuze ayekutsho ukuthi uyabe esenzani emizini yabomakhelwane bakhe,” kuphetha usobhuku uNyathi.
UMthunywa uxhumane njalo loGumede yena oveze ukuba kangeke enelise ukukuphika lokhu kodwa alulani lentatheli ngoba yena ezakuyazikhulumela phambi kwenduna.
“Angeke ngikuphike lokhu kodwa lina ntathelizindaba lingena ngaphi? Ngilinde idale linye hatshi ukuthi ngibe lokhe ngibuzwa imibuzo engelamkhawulo,” kutsho uGumede.
