uMthunywa
Thando Dube
KULENDODA etshiye izakhamizi zeMberengwa zibabaza zingaqedi ngemva kokubanjwa xhaka isenza ucansi lomalukazana wayo qede icatshe ngomunwe ithi iloyiwe.
Kubikwa uMnumzana Adam Sithole wakhandwa licinathunjana lakhe ekamelweni lakhe ethapha uluju lwemvelo lomalukazana wakhe, uAgnes Nhau.
Icinathunjana leli labikela unina, uNkosikazi Alice Sithole lamanye amalunga emuli abathi bembuza uSithole wathi ubengakwazi obekusenzakala ngoba ubeloyiwe.
UMthunywa ukhulume lelunga lemuli elikhethe ukungabethwa ngokwesaba elithe uSithole vele ugangile.
“Kambe kwake kwenzakala ngaphi emhlabeni ukuthi umuntu abanjwe esenza ucansi athi ubengakwazi okwenzakalayo ngoba ubeloyiwe.
“Engikwaziyo kusukela kudala yikuthi uSithole ugangile ngoba amahungahunga athi uyathinthitha abafazi babanye esigabeni ngakho lokhu okwakhe okokuthi uloyiwe ngamanga. Okukhona nje yikuthi ucatsha ngomunwe.
“Umalukazana nxa ebuzwa yena useyisimungulu sevala ngenyembezi ngakho abantu sebeze becabangela sibili ukuthi bayathandana njalo bebehlosile.
Umfakazi uphinde wathi uhlupho olukhona yikuthi amanye amalunga emuli, ikakhulu umkakhe, bayamvikela uSithole.
“Amalunga emuli ayamvikela uSithole ikakhulu umkakhe laye uyavuma ukuthi umkakhe angeke akwenze lokhu.
“Emhlanganweni babevumelene ukuthi uEnock umkaAgnes yena osebenzela kweleSouth Africa angatshelwa ngodaba lolu manje uhlupho yikuthi seluzwile udletshana lolu njalo kukhanya alumphathi usefuna ukuzothatha umkakhe ahambe laye,” kuchaza umfakazi lo.
UMthunywa uphinde wakhuluma loAdam Sithole othe banengi abantu abagangela imuli yakhe ngomhawu abalawo.
“Esigabeni lapha kulabantu abangangithandayo njalo abangenza loba yini ukuze sixabane njengemuli njalo siyezwa ngabosiyazi ukuthi kulabantu esigabeni abasigangelayo.
“Okokulala lomalukazana wami akulani lani,” kuphetha uSithole.
UMthunywa kenelisanga ukukhuluma losobhuku wakuleyondawo.
