uMthunywa
Ethel Ncube
KULENDODA yesigabeni seVenge eZvishavane emiswe phambi komthethwandaba weZvishavane isetheswa icala lokudlwengula umzukulu wayo ongaphilanga kuhle engqondweni ngoba ithenjiswe inotho.
Umsolwa oleminyaka engu-18 yokuzalwa esingeke samqamba ngebizo ngenhloso yokuvikela umamangala oleminyaka yokuzalwa engu-14 kubikwa udale icala leli kusukela ngenyanga kaMpandula kusiya kuMfumfu lonyaka.
Inkundla izwe ukuthi umsolwa ubenyenyela umamangala endlini yakhe yokulala ambambe iganyavu.
Kubikwa indaba le yaphuma egcekeni uyisekazi esenanzelele ukuthi umamangala usehlala ehlulukelwe kungakho wasembuza ukuthi kutheni umamangala wasechaza ukuthi umalumakhe uyamhlukuluza emacansini.
Umsolwa ebuzwa emthethwandaba ukuthi wakwenzelani lokhu uthe wavakatshela enye inyanga eyamtshela ukuthi ukuze abe lenotho kumele ahlangane emacansini lowesifazana ongaphilanga kuhle engqodweni.
Umantshi kulelicala, uMnumzana Archie Wochiunga uthe umetheswacala uzahlala ejele elinde ukubhalela emthethwandaba omkhulu ukuthi athole ibheyili.