uMthunywa
YiNtatheli kaMthunywa
KUDABA olutshiye izakhamizi zeCollen Bawn, eGwanda zingelankani kulendoda ebanjwe ngakomakhelwane ilomfazi womuntu yasibaleka inqunu.
Inkemenkeme le yenzakale ngoMgqibelo weviki ephelileyo.
UAddmore Kachidza (35), ubanjwe elele lomkaKuda Dube (36), ngalelolanga evela emsebenzini njengoba esebenza ebusuku.
Kuvele ukuthi uThando Moyo (31), onguye owatholakala lendoda endlini wavula isivalo engacabangeli ukuthi kungaba ngumkakhe lwamtshaya lwameqa uvalo ebona kunguye.
Kuzwakale ukuthi ngalesosikhathi itshamali kaMoyo yahle yacela ezinyaweni ingagqokanga.
UDube ubikele uMthunywa ukuthi waphelelwa wasala engumhlanga ebona umkakhe enanzelela ukuthi umkakhe wayenyenyisile waswela lamandla okuthi agijimise leyo ndoda.
“Ngaphelelwa ngesikhathi ngibona konke lokhu, okwangiqeda amandla kakhulu yikuthi umuntu lo ngiyamazi ngoba sisebenza sonke,” kutsho uDube.
Uqhubekele phambili waveza ukuthi uKachidza lo ngumngane wakhe. Uthe indoda le yayingayanga emsebenzini mhlalokhu ngoba ifuna ukunyenyela umkakhe.
“Ngibuhlungu kakhulu ngalokhu engakwenziwa yindoda le, kambe umuntu angaqamba amanga emsebenzini ethi uyagula esenzela ukuthi angidle izithende, angisoze ngimxolele,” kuveza uDube.
UDube uphethe ngokuthi umkakhe laye wahle wathatha okungokwakhe mhlalokhu walubhekisa kibo.
