uMthunywa
Cornelius Luphahla
KULENDODA edabuka esiqintini seShort Line koMathuphula eTsholotsho ekhala zize zome ngoyise oyinyanga ethi wamloya ngenhloso yokunotha nanko phela isileminyaka engu-37 kodwa kayikaze ithathe njalo kayilayo lemizwa yocansi.
Indoda le, uInnocent Ngwenya (37) ithi uyise uKenius Elias Ngwenya, oyinyanga umthwalele ubhulo ngokumthakatha okuyikho okubangela ukuthi angathathi njalo angabi laso isifiso sokuba lowesifazana afane lomthenwa.
Intatheli ikhulumisane loMnumzana Innocent Ngwenya wachaza ukuthi ubuhlungu ngoyise owamenza isihluku.
“Ngibuhlungu ngesihluku engasenziwa ngubaba sokungenza ngiphile njengenkabi ngoba efuna inotho. Noma ngihlezi nje kangilaso ngitsho isifiso sokuba lowesifazana njalo imizwa kangilayo yaqedwa ngubaba esenzela ukuzinothisa ngami,” kutsho uMnu Ngwenya.
UMnu Ngwenya uqhubekele phambili njalo wachaza ukuthi indaba yokuthi uloywa nguyise wayizwa ngabaphurofethi beZiyoni.
“Mina indaba le ngayizwa ngabaphurofethi beZiyoni lapha engikhonza khona. Ngathi ngimbuza ukuthi kungani engithakatha wathi kayisuye ngaphoswa ngumalume kodwa kazange wamqamba ukuthi nguphi umalume lowo.
Lokhu kwangenza ngathandabuza njalo ngabona ukuthi uphika icala alaziyo kodwa uyakwazi ukuthi nguye owangithakathayo.
“Ngesifiso sami ngabe uyavuma sihambe sonke kubaphurofethi laba abangitshelayo azizwele laye. Abaphurofethi laba bathi okwenza ubaba angiloye yikuthi mina kangizalwa ngumama lo amthetheyo ngakho bonke lomkakhe bafuna ngingaphumeleli empilweni kodwa laba abanye benze kuhle,” kutsho uMnu Ngwenya.
“Okunye okungizwisa ubuhlungu yikuthi umama omncane othethwe ngubaba kafuni ukuthi ngivakatshele odadewethu abazalwa nguye njengoba ngingasomntanakhe angazi ukuthi ungibangisani,” kutsho uMnu Ngwenya.
Ebuzwa ngale indaba uMnumzana Kenias Elias Ngwenya walile ukuthi nguye othakatha umntanakhe.
“Umntanami ulamanga ukuthi ngiyamthakatha, mina kangikwazi lokuthi uhlala ngaphi. Ngamcina kudala, uphanjaniswa yikuhamba ehlala lapha lalaphaya. Nxa kuyikuthi uyazibona ukuthi ulohlupho emzimbeni wakhe ngabe uyakhuluma kimi ngimzamele amacebo okumlungisisa.
“Lami nginje ngilesifiso sokuthi abe lomntwana okuyikuthi ngeke ngimloye uyangihlolela nje. Ngikhuluma nje angaze abuye lapha kasizwisisani uyanika abantu izinto ethi ngokwakhe wazisebenzela,” kuphetha uMnu Ngwenya.
