uMthunywa
Nkosilathi Sibanda
KUZAKHALA isigumula kuAmin Soma Phiri umsekeli kamqeqetshi weHighlanders, nanko kubikwa uselinde ukutshelwa ukuthi atshiye umsebenzi ngoba uyehluleka ukusebenza lesikhulu sakhe uErol Akbay.
Phezulu kwalokhu, kuzwakale ukuba ukuxotshwa kukaSoma Phiri kubangelwa yikungezwani kwakhe lomqondisi wabaqeqetshi uCosmas ‘Tsano Zulu.
UMthunywa uphethe loludaba ngokugcweleyo oluchaza ukuthi uAkbay ubikele inkokheli zeBosso ngoMvulo ngokukhathazeka kwakhe ngoSoma Phiri. Kubikwa uAkbay ukhala ngokuthi lokhe wafika koBulawayo, kasuthiseki ngesimilo sikaSoma Phiri. Lokhu kudale ukuthi iqula le-executive libizwe umhlangano ngoMvulo lapho uSoma Phiri atshelwe ukuthi afunde ukuhlonipha abaqeqetshi abaphezulu kulaye.
Abafakazi abaqotho abangene kulumhlangano babikele uMthunywa ukuthi uSoma Phiri loZulu bacelwe ukuthi balobe incwadi bechaza ukuthi yini ebenza bengaboni ngaso linye eqenjini.
“Bobabili uAmin Soma Phiri loCosmas Zulu bacelwe ukuthi balobe incwadi ezachasisa ukuthi yini ebahluphayo nxa belolonga abadlali. NgoMvulo bobabili babiziwe baziswa kabanzi ngokungasuthiseki komqeqetshi omutsha,” kutsho umfakazi oqotho ophakathi kweHighlanders.
Loba kungazange kucazululwe ukuthi yini elwisa amadoda la, uMthunywa uncwetshwe indlebe ukuba phakathi kukaSoma Phiri loTsano ukhona ozaxotshwa.
USoma Phiri kukhanya uswela usekelo okuyikhona okuzenza kube lula ukuthi kube nguye otshiya umsebenzi.
Udletshana olufike endlebeni zalintatheli lubika ukuthi uAkbay ubona angathi uSoma Phiri uyaphazamisa inhlelo zakhe ngoba akalandeli izixwayiso.
“Umqeqetshi omutsha wahle wakhala ngokuthi omunye kubhentshi labaqeqetshi Phiri kukhanya akafuni ukulandela izixwayiso. UAkbay uthi kaziboni ephumelela nxa elomsekeli oveza ukuthi akamthakazeleli,” kwazisa umfakazi lo.
Isikhalazo sikaAkbay ngoSoma Phiri kuthiwa yiso esithinte inkokheli eziphange zacunuka ngezenzo zalumsekeli kamqeqetshi kaMantengwane.
Iphephandaba likazulu likhulume loNdumiso Gumede umaqhuzu weHighlanders obike ukuba udaba lolu baluphethe.
“Angeke ngitsho okunengi kodwa lukhona udaba lwabaqeqetshi bethu esilalo. Kukhulunywe ngakho emhlanganweni wangoMvulo sibili,” nguGumede lo.
Iphephandaba likazulu livakatshele enkundleni yeBarbourfields kodwa abaqeqetshi laba balile ukukhuluma ngokwenzakala enkambeni.
Ngesizini edluleyo umaqhuzu weBosso lomgcinisihlalo uPeter Dube babikela intatheli ukuthi bazayehlukana loSoma Phiri loZulu kulumnyaka. Kumangalise abasekeli baleli qembu sekuthiwa sebeqhatshiwe njalo kulisizini.
UGumede wazise leliphephandaba likazulu iqiniso ngekusasa labaqeqetshi laba uSoma Phiri loZulu lizaziwa kusiyaphela iviki.
Ukungezwani kukaZulu loSoma Phiri kugcwale amaphephendaba lasebulenjini. Kuvele ukuthi uSoma Phiri ufuna ukukhetha abadlali bakhe kuqembu leHighlanders kulisizini kukanti loZulu ufuna ukusayina abakhe njalo.
Okwamanje, uMthunywa uyabika ngokungesabi ukuthi bakhona abadlali abalwethalenta abakhalala ukuzama ukudlalela iHighlanders ngenxa yenkethabatshabi yabaqeqetshi laba.
Inengi labadlali laba libika ngezimathonsi ukuthi iphupho labo lokudlalela iHighlanders lacitshwa yibudlwangudlwangu obenziwa ngabaqeqetshi bobabili enkambeni yokulolonga.
USoma Phiri loZulu bathole udumo lokuhlonitshwa ngesizini edluleyo ngesikhathi becelwe ukuthi babambe umsebenzi ngemva kokuxotshwa kukaBongani Mafu.
Abaqeqetshi laba baphakamisa iBosso kumidlalo embalwa eyayisele. Ithimu le yabayintshantshu yenkezo yeEasyCall iqeqetshwa nguSoma Phiri.
