uMthunywa
Ncekwenhle Ncube
UMGADLI omkhulu uAllen Gahadzikwa usenakane ukugena kuthimu yezwe lonke nanko phela usevumile ukuthi agqoke ijesi yeHighlanders kuqala ihlandla lesibili leligi yeCastle PSL.
UGahadzikwa ubetshibilikela iqembu leCaps United.
UMthunywa uyakuveza njalo ukuthi uMilton Ncube, obengumdlali weHighlanders ngesizini ka2014, usengene kuHow Mine.
Abafakazi abaqotho abasebenza emahofisini eBosso babikele lintatheli ukuthi uGahadzikwa usendleleni yokuza koBulawayo njalo ulakho ukuba yingxenye yalithimu mhla iBosso idlala leCaps United ngeSonto.
“UAllen Gahadzikwa usemabhukwini eHighlanders. Ulakho ukuba lathi kusukela ngoLwesihlanu,” kubika umfakazi oqotho, oyisikhulu njalo kuBosso loba nje eyale ukuqanjwa.
Ekhuluma loMthunywa mayelana loMilton Ncube, umqeqetshi weHow Mine uKelvin Kaindu kazange akufihle ukuthi umdlali lo usengowakhe.
“UMilton udlala kuqembu lami njalo usengowethu. Sekulesikhathi elolonga lathi ngakho angikufihli ukuthi usengowethu kuHow Mine,” kutsho uKaindu ngoLwesithathu ntambama.
Ukuthengwa kukaGahadzikwa yiHighlanders kubonakala angathi yikho okuzavala isikhala esitshiywe nguBruce Kangwa.
Ebuzwa ngalokhu, umqeqetshi weBosso uErol Akbay uthe intatheli azimelele umbiko ozaphuma kuqembu.
Kusenjalo, uAkbay uyadela kulezinsuku nanko phela iqembu lakhe selidlalisa amajaha asakhulayo njalo agalela amadoda amadala abongolele njengenkomo.
Lokho kutsho ukuba abadlali beHighlanders abadala ababalisa uEric Mudzingwa loSimon Munawa bengathwala nzima ukulikhaba kuhlandla leligi elilandelayo.
UAkbay loba ehluleke ukuthi anqobe edlala leTriangle kumdlalo ophele ungutshiki lobhanqa 0-0 izolo eMagumeni, usebonise amaqembu adlala kuPSL ukuthi abafana abancance, ikakhulu uBrian Banda balamandla okutshaya babhuqe amaqembu onke abadibana lawo.
Ngempelaviki yonale umqeqetshi weqembu ubephosele ijaha elisakhalulayo uProsper Mathuthu ngesikhathi bengqikilana leHarare City. Utshiye amadoda amanengi etshaya ukhwelo, imvokloklo lamavuvuzela ngemva kokuphenduka isinama esinamathele imbekwa kwethusa inkundla yonke.
Kanti njalo ngemuva ngapha umlungu sewakhetha ukungcina umfana omncane uPeter Mudhuwa. Akavali nje umfana uthela amanzi. Khona kulenzinsuku ubheda njengesilwane esilambileyo. Ngemva kweviki ephelileyo waginqisa abadlali beMakepekepe beze bayitshaye 1-0 uLeonard Tsipa waze wamhlaba ngempama.
Enkabeni lapha kuzibambile okungabafana uKing Nadolo, Bukhosi Dube loSilla Andrella. Kutshibilika lapha uze ubone umlungu ehlekelela. UNadolo yena uyalidlala umfana uzwe kuduma iSoweto ngiyakutshela.
Enhlokweni ngapha kulomfana uPrince Dube. Akagijimi nje umfana uthela amanzi. Abalandeli bakaMantengwane bathi ugijima njengendoda ethathelwe umfazi. Nguye phela owathambisa iDynamos ngemva kokutshayela ibhola elilodwa emambuleni selokhu kwasekuleminyaka bacina ukuyinqoba.
Balusizi abalandeli bezikaMagebhula ngokuhanjelwa nguKangwa obesephenduke uNsukuzonke weqembu. Kodwa-ke abakhali kangako nanko phela iqembu selithenge umfana omncane uNhlanhla Ndlovu obegijima kuMagagasi ekuDivision 1.
Kukhanya kuyathembisa ukuthi uzazama ukuluma ngamazinyo ukuze isikhexe sikaKangwa loKnox abathengwe ngamaqembu aphandle kwelizwe singakhanyi.
Kulabafana abancane ababalisela uPrince Dube onguye okhanya ezibambile ekugadleni, nguye futhi owachumisa iDynamos ngokutshayela ibhola elilodwa ngemva kwesikhathi eside bengakaze bayinqobe.
Akunsuku zingaki lapho iqembu lithenge uNhlanhla obedlalela Amagagasi ekuDivision 1 ukuze bazuze omunye umdlali ozadlala endaweni kaKnox othengwe liqembu elidlala phetsheya.
Impumela yemidlalo yeCastle Lager eqhutshwe ngoLwesithathu: Highlander 0, Triangle 0; Tsholotsho 1, Mutare City.
