uMthunywa
IHighlanders ingabe yanqoba kumidlalo yayo yenkezo yeZNA Charity kusizini edluleyo kodwa kusegcekeni ukuthi izathwala luklubhu mhla imelane labafana beFC Platinum ngempelaviki.
Kukhangelelwe ukuthi iHighlanders iphenduka ivela eSouth Africa ifikele phezulu kwalumdlalo enkundleni yeBarbourfields. Umdlalo lo uyingxenye ye-semi-final yalinkezo. Omunye umdlalo udibanisa iCaps United leDynamos ngeviki ezayo.
Ngalelolanga kukhangelelwe njalo ukuthi umqeqetshi weBosso uErol Akbay avule amehlo ngoba iqula leFC Platinum alisoke livume ukwehliswa lona seliyilungiselele ngamandla isizini ka2017.
Kumalungiselelo alisizini, iqembu leFC Platinum selihambe isibanga eside ngokudlala inguqu kusukela ngoZibandlela kukanti iBosso ibiphatheka kumidlalo emncinyane yobungane.
U-Akbay uyaqala ukunambitha umdlalo lonyaka phambili kwabalandeli boqobo. Umdlalo lo yiwo ozamdonsela amehlo, kudingisiswa ukuthi umqeqetshi useyitshintshe kangakanani ithimu.
Amathimu womabili acina ukungqikilana mhlaka 20 kuLwezi, 2016 lapho izimbamgodi zeFC Platinum ezanqoba khona iBosso 3-0 kumdlalo weligi.
Okungasiza uAkbay yikuthi umqeqetshi wama-FC Platinum uNorman Mapeza utshele intatheli ngoLwesibili ukuthi uzaphumuza abanye abadlali.
Bekuzwakale ukuba iFC Platinum ithe abadlali bayo baphumule okweviki yonke kulandela ukudlala kwabo lamathimu aseSouth Africa kumalanga adluleyo.
Inkunzi zenguqu lezi zidibana kulinkezo lokhe yasungulwa ngo-2013. Inkezo le idlalelwa ngamathimu amane.
Isikhulu sabaqeqetshi beBosso uCosmas “Tsano” Zulu ulokukholwa ukuthi uAkbay nguye umqeqetshi ozayiqethula iFC Platinum.
Umbiko ophuma kubaqoqi benkezo yeZNA Charities ukhuthaza ababukeli bomdlalo ukuthi bagcwale ngobunengi babo Emagumeni.
Imidlalo: Highlanders v FC Platinum (Babourfields Stadium); Caps United v Dynamos (Rufaro Stadium)
