uMthunywa
Nkosilathi Sibanda
IHIGHLANDERS ingabe yanqoba kumidlalo yayo eyedluleyo kodwa kusegcekeni ukuthi izathwala luklubhu mhla imelane lentshantshu zomdlalo iChicken Inn kunkezo yeZNA Charity kulimpelaviki.
Ngelolanga kukhangelelwe ukuthi umqeqetshi weBosso uErol Akbay avule amehlo ngoba iqula leChicken Inn alisoke livume ukwehliswa lona selidlala ngamandla kulezinsuku.
IChicken Inn ingan umdlalo lo isihambe isibanga eside ngokudlala inguqu kusukela ngoZibandlela ikanti iHighlanders ibiphatheka kumidlalo emncinyane eyobungane.
U-Akbay uyaqala ukunambitha umdlalo womncintiswano kuChicken Inn njalo umdlalo lo yiwo ozamdonsela amehlo, kudingisiswa ukuthi ungumqeqetshi olamacebo anjani.
Amathimu la acina ukugqikilana mhlaka 13kuZibandlela 2015lapho iBosso eyanqoba khona 3-1 kunkezo yeEasyCall eBarbourfields. NgeSonto kubuyelwa enkundleni efanayo kodwa okwahlukileyo yikulungiselela kwathimu.
Okungasiza uAkbay yikuthi umqeqetshi wama-Gamecocks uJoey Antipas utshele intatheli ngoLwesibili ukuthi uzaphumuza abadlali bakhe abaligugu kuye ababalisi uDanny Phiri, uMitchell Katsvairo, uElvis Chipezeze loEdmore Chirambadare.
U-Akbay unikezwa ithuba lokugcwalisa isifiso sabalandeli bethimu yakhe iHighlanders FC ngokunqoba iChicken Inn.
Ngokwakuqala ukuthi inkunzi zenguqu yakoBulawayo zidibane kulinkezo lokhe yasungulwa ngo-2013.Inkezo le idlalelwa ngamathimu amane. IDynamos idlale yanqotshwa yithimu yeZPC Kariba ngeSonto edluleyo.
Isikhulu sabaqeqetshi beBosso uCosmas ‘Tsano’ Zulu ulokukholwa ukuthi uAkbay nguye umqeqetshi ozayiqethula iChicken Inn.
“Umdlalo wonke esilawo uletha umthwalo onzima kodwa angeke ngithi iChicken Inn siyayiqakathekisa. Yithimu njengawo wonke esidlala lawo.”
Umbiko ophuma kubaqoqi benkezo yeZNA Charities ukhuthaza ababukeli bomdlalo ukuthi bagcwale ngobunengi babo Emagumeni.
