uMthunywa
YiNtatheli kaMthunywa
UMQEQETSHI weTsholotsho FC uLizwe Sweswe kubikwa ulinde ukuthenga omunye umgadli odlala eseNgilandi kunyathelo lakhe lokuzama ukugcina ithimu le ikuligi ephakemeyo.
Ngokukhangelisisa isimo sengalane yeligi yeCastle, iTsholotsho ihlezi endaweni engathembisiyo ukuthi iqembu lizaqhubeka lidlala. USweswe uyala ukuthi iqembu lakhe selitshiywe yisikhathi sokuguqula indlela elidlala ngayo kuPremier Soccer League (PSL), okungacina kubangela ukuthi liphindele kuligi kaDivision One.
Ithemba lomqeqetshi lo likubadlali azabathenga nxa iwindi lekhefu selivuliwe.
USweswe uthe iqembu lakhe sokumele likhwince amabhulugwe linqobe kumidlalo yalo elandelayo ukuze lingaphumi kuPSL.
“Sikhona kuligi le ngoba angeke ngithi sesilahle imbeleko okwamanje. Kungaze kuthiwe sesitshiywe yisikhathi sokuthi sithole imiklomelo, mina angikuvumi lokho. Okumqoka yikuthi kumele sikhule njengeqembu.
“Ukuzimisela kwabadlali kanye losekelo lwabalandeli yikho okusifikise lapha. Umncintiswano uyaqhubeka ngesigaba sesibili seligi yethu, lokho kutsho ukuthi sizaqhubeka ngegiya elifanayo,,” kutsho uSweswe.
USweswe uqhubekele phambili ngokuthi iqembu lakhe lilomlandu omkhulu kuligi le njalo abalandeli balo akumelanga bakhathazeke ngoba amacebo okuthi lingaphumi kuligi alokhe ekhona.
“Maviki onke silungiselela imidlalo yethu ngokugcweleyo njalo sikhangelele ukunqoba kumidlalo yethu ezayo,” kuqhuba uSweswe.
Phakathi kwamathimu aphuma kumhlubulo wezansi iTsholotsho FC ibiqale isizini yalonyaka kuhle sibili njalo ithimu le igcwele abafana abasakhulayo okuyikho okumqoka ngoba belakho ukugcina iqembu labo, bakhule lalo.
Lanxa iqembu leli lidlala angathi likhohliwe ngokuthi lingaphuma kuPSL, lilabadlali abake badla ubhedu kwamanye amathimu asehlale kuPSL okwesikhathi eside.
Iziphathamandla zaleliqembu zibikele iphephandaba likazulu ngoLwesibili ukuba kulabadlali abathize abazababhalisa ngesikhathi sokuvulwa kwefasitela lokuthenga kumbe lokuthengisa abadlali.
Omunye walababadlali kubikwa uvela elizweni laseNgilandi.
