uMthunywa
YiNtatheli KaMthunywa
ISIKHULU sabaqeqetshi beHighlanders uCosmas ‘‘Tsano’’ Zulu usetshelwe ukuthi ayekele ukuphupha lokutatazela endaweni yokuthi alungisise iqembu.
Abalandeli bethimu le bahlasele uTsano ngeSonto bamtshela ukuthi ukukhuluma kwakhe akusoze kuncede iqembu leli eselikhangelane lokuxotshwa kuPSL lonyaka, nxa engehluleka ukunqoba kumidlalo elandelayo.
UTsano wenze isimanga esingakaze senzakale kumbali yeBosso ngeSonto eClub House ngokwenza umhlangano labalandeli bethimu, esithi ufuna ukwazi imibono yabo ngomdlalo abawudlale leDongo Sawmills.
Ngemva kokulalela imibono lezikhalazo, uTsano usele esezisola ngenyathelo lakhe. Abalandeli beHighlanders bahlamukele umqeqetshi lo baqala ukumtshela ukuthi alungise ithimu atshiyane lokuzenza ‘‘umuntu ongcono’’ eqenjini.
Abalandeli laba, abakade befika amatshumi amabili abazange bakufihle ukuthi uTsano wenze iphutha ‘‘ngokutatazela’’ ukwenza umhlangano ngesikhathi ithimu ingenzi kuhle.
Bambuze ukuthi kuyini okumangalisayo ngokunqoba kweBosso 2-1, okungadala ukuthi umqeqetshi lo abize umhlangano.
“Usibuzelani lokho kulokuthi ulungise ithimu. Asiqakezeli into ezingekho thina. Ngeke siqinele ukuthabela ukudla amathimu amancane njengeDongo Sawmills. Kungani ungasibizanga (Tsano) ngesikhathi sinqotshwa yiCaps United.
“Yekela ukuphupha Tsano, hamba uyelungisa ithimu, asifuni ukuya ku-relegation,” kuthetha omunye umlandeli othe unguMbonisi Ndlovu.
Abalandeli bacine sebengasazwisisi ngoba uTsano ubeselokhu eqhubeka echasisa indlela ithimu edlala ngayo.
UTsano uqhubeke etshela abalandeli laba ukuthi kungani engadlalisi abadlali abathile.
Uthe isizini ize iyephela abaqeqetshi bazakhetha abadlali asebekhulile.
“Asingeke sisebenzise abadlali abafana loKing Nadolo labanye ngoba sesifuna abalolwazi lenguqu ukuze siqede sikunombolo ehloniphekayo.
“Silabadlali abanengi asebedlala ababengadlali ngesikhathi sikaKaindu (Kelvin). Ithimu iyatshona ngakho abadlali abasakhulayo kumele bame kancane,” kutsho uTsano.
Umhlangano lo ucine usudilika ngoba abalandeli sebefuna ukukhuluma lomgcinisihlalo wethimu uPeter Dube, kodwa kwehlula.
