uMthunywa
Ethel Ncube
AMAPHOLISA akuleli aweZimbabwe Republic Police asekhuthaze uzulu ukuthi njengoba silanda isikhathi sekhefu bahambe bephethe izithupha loba incwadi eziveza ukuthi bangobani.
Inkuthazo le iza kulandela ukwanda kokutholakala kwabantu befile kodwa bengelancwadi eziveza ukuthi bangobani.
Isikhulumi samapholisa esabelweni seNkabazwe uInspector Emmanuel Mahoko uthe kulezidumbu esesilenyanga ezimbili sisemotsha yesibhedlela seKwekwe okulokhu kudingwa ukuba ngesikabani.
“Kulesidumbu esesilenyanga ezimbili singakathathwa ngoba lowomuntu wayengelasithupha loba incwadi ezitshengisa ukuthi ungubani, uhlala ngaphi futhi lobani.
“Umuntu lo kwatholakala nje ukuba nguAlboy Ncube, njalo ehlelwa yingozi yemota emgwaqweni weKwekwe leGokwe wahle wedlula kungozi le.
“Kuze kube lamhlanje akulamuntu oseke wamdinga loba osebuye ukuzothatha isidumbu sakhe,” kubika uInsp Mahoko.
Uqhubekele phambili wathi kubalulekile ukuthi abantu nxa besuka lapho abahlala khona bazise loba isihlobo esisodwa kumbe umngane ngalapho abayakhona.
“Umuntu nxa elohambo kahambe lamaphepha kumbe isithupha esitshengisa ukuthi ungubani kusenzelwa ukuba kungabakhona okuvelayo kubelula ukuthi kwazakale ukuba ngubani owangaphi.
“Kuhle njalo ukubikela isihlobo kumbe umuntu omthembayo nxa uphuma kusenzelwa ukuba nxa sokukhona okudingakalayo kuyabe kukhona ololwazi ngawe,” kuphetha uInsp Mahoko.
