uMthunywa
Cornelius Luphahla
MHLAKA 29 kuyonale inyanga iqembu leSunduza Dance Theatre lizaphakulela uzulu umdlalo walo omutsha othi; Mathatha the Big Problem eBulawayo Theatre.
Umdlalo lo uhlose ukwembula inhlupho ezehlukeneyo ezibhekane lozulu kusukela ngesikhathi senkosi uMzilikazi.
Umdlalo lo ozabe usethulelwa uzulu okwakuqala ulingiswa zitshantshu zabalingiswa abazaveza inhlupho lezi.
UMthunywa uxoxisane lomsekeli kaMqondisi waleliqembu uCharles Banda waveza ukuthi umdlalo lo ukhuluma ngezinto ezenzakalayo khathesi ezazixoxwa nguRobert Moffat lenkosi uMzilikazi.
“Umdlalo lo sawusungula ngemva kokubala ugwalo olwalotshwa nguRobert Moffat oluthi National Archives of Rhodesia njalo luyingxoxo phakathi kwakhe lenkosi uMzilikazi. Engxoxweni le babexoxa ngenhlupho ezingahlasela isizwe sakoMthwakazi.
“Inhlupho lezi zaqala kudala ukuba khona lapha njalo yizo ezilokhu zisihlasela khathesi okuchaza ukuthi ugwalo lolu lukhuluma iqiniso. Thina njengeqembu elikhuluma izehlakalo ngobulingisi, ukugida kanye lokuhlabela sizazethula ke inhlupho lezi ngale indlela,” kutsho uBanda.
UBanda uqhubekele phambili njalo waveza ukuthi kuleliqembu basebenza bengamalunga alitshumi.
“Thina njengeSunduza Dance Theatre sisebenza singamalunga alitshumi agoqela uCharles Banda, uBekithemba Sibanda, uKhaliphani Ndlovu, Peter Ruwanga, Baphi Fafaza Mdladla, Mkhululi Khanye, Ivy Nkhoma, Linda Sithole, Ntando Sithole loSikhangezile Ndlovu,” kutsho uCharles Banda.
UPeter Ruwanga omunye wamalunga aleliqembu uchaze ukuthi ukhuthaza abantu ukuthi babuye bezozibonela ukudla kwamehlo.
“Umdlalo lo ukhuluma ngendaba ezenzakala khathesi ngakho sikhuthaza uzulu ukuthi aphatheke kulo umkhosi ukuze azibonele angezwa ngelikabathi. Umdlalo lo sikhethe ukuthi siwenzele eBulawayo Theatre ukuze wonke umuntu olapha koBulawayo olesifiso sokuba khona enelise ukubuya ngoba kungekho khatshana,” kutsho uRuwanga.
U-Producer waleliqembu uPhillip Weiss uchaze ukuthi iqembu leli liveza imbali yesizwe ngendlela yokujabulisa abantu.
“Leliqembu liveza imbali yesizwe seZimbabwe ngendlela eziyikuthokozisa abantu kuphela. Ngalokhu mina ngifika lembali yakhona kumbe lendaba ethile bona bayiguqule ibe yingoma, umgido kumbe umdlalo wobulingisi,” kuphetha uWeiss.
